Tedi Blushi, zëdhënësi i Presidentit të Republikës Ilir Meta ka reaguar pas akuzave të kryeministrit Edi Rama që etiketoi Kreun e Shtetit si “një të çmendur që ka frikë nga drejtësia që do të vijë përmes reformës”.
Rama fliste në komentin e tij se ishte në krah të partnerëve ndërkombëtarë të SHBA dhe BE, por nëpërmjet një statusi të shkurtër në rrjetin social, zëdhënësi i Metës, shkruan se “kryeministri i vendit ka vetëm një partner, Xibrakën dhe Kolumbinë”.
Blushi i referohet fshatit të Xibrakës në Elbasan, ku disa vite më parë u kap laboratori i parë (i përmasave të mëdha) i kokainës në vend. Në atë kohë eksponentë të opozitës e akuzuan drejtpërdrejt kryeministrin dhe vëllain e tij për lidhje direkte me këtë laborator të drogës.
Rama lajmëroi se do të prezantojë nesër në parlament paketën “anti- KÇK” (Kap ça të kapësh), një ligj special që do të godasë prokurë, gjyqtarë e të tjerë zyrtarë të korruptuar e të lidhur me krimin.
