Kryeministri i Shqipërisë, Edi Rama i është përgjigjur kërkesë së kreut të Partisë Demokratike, Lulzim Bashës, për të dhënë dorëheqjen pas vendimit negativ të Këshillit Evropian për negociatat e anëtarësimit në BE, duke iu referuar shembullit të shefit të qeverisë maqedonase, Zoran Zaev.
Përmes një foto-mesazhi të publikuar në llogarinë e tij zyrtare në “Facebook”, Rama citon kreun e Këshillit, Donald Tusk, i cili pas komunikimit të vendimit, u shpreh se mungesa e unanimitetit të vendeve anëtare të BE-së për hapjen e negociatave, nuk ndodhi për faj të Shqipërisë dhe të Maqedonisë së Veriut. “Nuk pati unanimitet për negociatat! Nuk është faji i Shqipërisë dhe i Maqedonisë së Veriut”, tha Tusk.
Përbri këtij citimi, Rama ka vendosur një fjali nga deklarata e Bashës, i cili e konsideroi moshapjen e negociatave si dështim të qeverisë. Bashkëngjitur postimit, Rama ka shkruar me ironi “PA KOMENT”.
Në një deklaratë të mbajtur paraditen e sotme, Basha tha se Rama duhet të largohet dhe t’i hapë rrugën zgjedhjeve të parakohshme, duke mos dhënë detaje nëse opozita do t’ju kthehet ose jo protestave.
