Tragjedia e jashtëzakonshme që goditi Venezuelën gjatë natës, me dy lëkundje shkatërrimtare tërmeti në një distancë shumë të afërt kohore nga njëra-tjetra (me magnitudë 7.2 dhe 7.5, me epiqendra në thellësi të ulët që i kanë amplifikuar më tej pasojat shkatërrimtare), në zonën qendrore-veriore të vendit, ka shkaktuar – përveç shembjes së pallateve të tëra – edhe shumë të vdekur e të plagosur. Bilanci bëhet gjithnjë e më tragjik nga ora në orë, pasi ende ka mijëra persona të zhdukur dhe me shumë mundësi shumë prej tyre ndodhen ende nën rrënoja. Është makthi më i keq që mund t’i ndodhë kujtdo që nuk ka më lajme për të afërmit e tij, siç i ka ndodhur edhe Lucas Trejos, mbrojtësit argjentinas që luan te Club Sport Maritimo de La Guaira, në kategorinë e dytë venezueliane.
Trejo ishte në transfertë me skuadrën, familja e tij u zhduk
Futbollisti 38-vjeçar nuk ndodhej në shtëpi në momentin e tërmetit, pasi ishte në Karakas, i grumbulluar me skuadrën e tij, që do të luajë një ndeshje kupe në stadiumin Brigido Iriarte të kryeqytetit venezuelian. Natyrisht, Trejo u përpoq menjëherë të kontaktonte bashkëshorten e tij Yani, e cila kishte mbetur në shtëpi bashkë me dy fëmijët, Aaron dhe Ainhoa, por nuk mori përgjigje. Ankthi i tij u bë i padurueshëm kur mësoi se pallati i tyre ishte shembur.
Në fakt, zona më e goditur nga tërmeti është pikërisht shteti i La Guaira, i shpallur “zonë katastrofe” nga presidentja e përkohshme Delcy Rodriguez: dhjetëra ndërtesa janë shembur, mes tyre edhe kompleksi rezidencial ‘Cumanagotto’ në Playa Grande, ku jeton familja e Lucas Trejos. Ekipet e shpëtimit po gërmojnë pa ndërprerje mes rrënojave, në një skenar apokaliptik ku numri i viktimave rritet vazhdimisht.
Kërkesa për ndihmë e futbollistit argjentinas
Me kalimin e orëve, mijëra njerëz nisën të kërkonin ndihmë në rrjetet sociale për të gjetur familjarët e zhdukur. Mes tyre edhe futbollisti argjentinas, i cili tregoi situatën e tij në një histori të publikuar në Instagram, duke iu drejtuar kujtdo që mund të kishte lajme për të afërmit e tij. “Ndërtesa jonë në Playa Grande është shembur, nuk di asgjë për familjen time. Ju lutem lutuni për ta dhe shpërndajeni këtë mesazh nëse dikush i ka parë. Dua të besoj se nuk ishin aty, lutuni për familjen time, ju lutem”, u lut mbrojtësi qendror i Maritimos në mesazhin e tij prekës, duke vendosur emrat e bashkëshortes dhe dy fëmijëve të vegjël mbi fotografinë ku shfaqet e gjithë familja.
Kush është Lucas Trejo, karriera e mbrojtësit 38-vjeçar argjentinas
Lucas Federico Trejo ka lindur në Kordoba të Argjentinës, më 29 dhjetor 1987. Mëngjarash, ai luan kryesisht si mbrojtës qendror dhe aktualisht është pjesë e klubit venezuelian Maritimo La Guaira. ‘El General’, siç e kanë nofkën, ka pas një karrierë shumë të gjatë dhe të larmishme: pasi e nisi në kategoritë e ulëta spanjolle me L’Escala, u transferua në Greqi ku veshi fanellat e Atromitos, Asteras Kaisarianis dhe Egaleo.
Më pas u kthye në Argjentinë duke luajtur për Sportivo Belgrano, Racing de Cordoba dhe Instituto, përpara se të provonte një eksperiencë në Shtetet e Bashkuara me Jacksonville Armada në vitin 2015.
Pjesa më domethënëse e karrierës së tij është zhvilluar kryesisht në Venezuelë, ku ka arritur rezultate të mira dhe shumë paraqitje me Monagas, Deportivo Tachira, Zamora, Portuguesa dhe, që nga shkurti i vitit 2026, me Maritimo në Segunda Division. Gjatë viteve ai ka pasur edhe eksperienca të shkurtra me Atletico Huila në Kolumbi, Zacatepec dhe Atletico Morelia në Meksikë, si edhe Deportivo Municipal në Peru. Pra, një “globetroter” i vërtetë i futbollit, ende fizikisht i fortë dhe shumë i besueshëm në moshën 38-vjeçare. Të gjitha këto tani kalojnë në plan të dytë, në një moment të tmerrshëm të jetës së tij.
