Vendimi që pritet të merret në harkun dyditor 17-18 tetor në Këshillin Evropian për hapjen ose jo të negociatave të anëtarësimit në BE për Shqipërinë dhe Maqedoninë e Veriut, është padyshim kryetema më e diskutuar së fundmi në rrafshin publik në vend.
Krahas mbulimit mediatik përmes emisioneve televizive apo artikujve shterues në shtypin e shkruar, çështja e negociatave ka një prani të konsiderueshme edhe në faqet e njohura të memeve në rrjetet sociale.
Natyrisht, në këtë hapësirë virtuale, sikurse ndodh rëndom, qendrimi kundërshtues për hapjen e negociatave i presidentit francez, Emanuel Macron, i cili në konferencën për shtyp që pasoi takimin e djeshëm me kancelaren gjermane, Angela Merkel, theksoi problematikën e fluksit të azilkërkuesve shqiptarë, është shoqëruar nga postime ironizuese.
Kështu, “Brryli Broadway”, një ndër faqet më të ndjekura online veçanërisht nga një audiencë të rinjsh, ka zgjedhur të interpretojë qendrimin e Macron duke postuar një foto të kryeministrit Edi Rama në Komisionin Evropian, ku shfaqet me një pamje të trishtë duke thënë se “Fajin e ka Saliu që liberalizoi vizat”. Një tjetër meme ironizon gjithashtu Ramën, i cili i drejtohet Macron me fjalët monumentale të veprës shekspiriane “Jul Çezari”: “Edhe ti, Brut?!”.
Sot nis në Bruksel takimi i liderëve të BE-së, në punimet e të cilit hapja e negociatave me dy vendet kandidate nga Ballkani Perëndimor është njëra nga pikat e diskutimeve, krahas Brexit-it dhe operacioneve ushtarake të Turqisë në verilindje të Sirisë. Deri më tani, Franca është kundër nisjes së bisedimeve, ndërsa Holanda dhe Danimarka anojnë më tepër nga skepticizimi. Ndërkohë, siç u pa në fund të shtatorit, Gjermania është pro hapjes së kushtëzuar të negociatave, duke i vendosur qeverisë shqiptare një listë me 9 kritere (imediate dhe afatgjata) për t'u përmbushur. E të njëjtit mendim është edhe Athina zyrtare. ©Lapsi.al
