Nuk ka fitues në Old Trafford. Teatri i Ëndërrave mbeti ëndërr për Arsenal e skenë e pashfrytëzuar për Manchester United, që ndanë pikët me barazimin 1-1, në 90 minuta të ekuilibruara, të kondicionuar edhe nga reshjet e shumta të shiut. Zhgënjim për Solskjaer që në një pikë të ndeshjes u duk shumë më pranë fitores, por që e dorëzoi në kundërsulmin vrastar të Aubameyang dhe tani është në pozitë shumë të vështirë.
Në javën e 7 të Premier, United kishte impaktin më të mirë me ndeshjen, por ishin Gunners që kishin mundësitë e para për shënim: De Gea nuk lejoi prekjen e rrjetës në goditjen e Saka, duke mbajtur Red Devils në lojë. Një ndihmë që United e kapitalizon me avantazhin e jashtzakonshëm të Scott McTominay, pikërisht përpara se skuadrat të shkonin në dhomat e zhveshjes.
[video width="1280" height="720" mp4="https://cdnimpuls.com/lapsi.al/wp-content/uploads/2019/09/united-goal.mp4"][/video]
United duhet të kontrollonte sfidën, me rezultatin të arritur, por as këtë nuk e bën dot, duke i dhënë mundësinë Arsenal të gjejë hapësira të patolerueshme, që Aubameyang i shfrytëzoi në minutën e 57-të. Kontroverse situata e golit të gabonezit, sepse asistenti sinjalizoi pozicion jashtë loje, por ndërhyrja e VAR legjitimoi një gol krejtëisht të rregullt.
[video width="1280" height="720" mp4="https://cdnimpuls.com/lapsi.al/wp-content/uploads/2019/09/arsenal-goal.mp4"][/video]
Manchester mund ta fitonte ndeshjen në frymën e fundit, por Leno ishte spektakolar në minutën e parë shtesë, duke evituar humbjen e londinezëve. Gunners mbeten në vendin e katërt me 12 pikë, por për United situata nuk është aspak e mirë: në vendin e 10 me nëntë pikë, Solskjaer duhet të bëjë llogaritë me 12 pikë që e ndajnë nga Liverpool kryesues në vetëm 7 javë kampionat e në fundjavë vjen transferta kundër Newcastle United.
