Kryetarja e Bashkisë së Shkodrës, Voltana Ademi, ka shprehur vendosmërinë për të respektuar dekretin e presidentit të Republikës, Ilir Meta, për shtyrjen e zgjedhjeve vendore.
Në një deklaratë për mediat, Ademi ka denoncuar se punonjës të Policisë Bashkiake, gjatë ushtrimit të detyrës, janë shantazhuar nga persona civilë të prezantuar si punonjës të Policisë së Shtetit. “Gjatë ushtrimit të detyrës, punonjësit e Policisë Bashkiake, gjatë ditës së sotme, janë shantazhuar nga disa persona civilë, që janë prezantuar si punonjës së Policisë së Shtetit. Ata ndër të tjera i kanë kërkuar verbalisht, që në orën 15.30 të paraqiten në zyrën e oficeres së Policise Gjyqësore Sulela Gerxhaliu. Ky eshte nje veprim i paligjshem dhe qe nxit konflikt. Ky eshte nje veprim qe i trajton zyrat e shtetit si sekretar privat te Edi Rames dhe punen shteterore si pune partie.”- deklaroi Ademi.
Kryebashkiakja demokrate ka ritheksuar se do të zbatojë vendimin e kreut të shtetit në lidhje me zgjedhjet e 30 qershorit, duke shtuar se nuk do të trembet nga asnjë kërcënim.“Si kreytare e Bashkisë së Shkodrës jam e vendosur të zbatoj dekretin e Presidentit të Republikës për shfuqizimin e datës 30 Qershor. Asnjë kërcënim, nuk më ndal, as mua dhe as kolegët e mi në të gjithë Shqipërinë, që të veprojnë në respekt të ligjit dhe shtetit të së drejtës. Shtetin personal, me institucione personale, Edi Rama nuk ka për ta ndërtuar dot në Shkodër.”- tha Ademi.
