Partia Demokratike ka risjellë në vëmendje 6 përgjimet lidhur me dosjen 339/1 të tabloidit gjerman “Bild”, rreth hetimeve mbi bashkëpunimin e një organizate ndërkombëtare të trafikut të drogës, të njohur si “Klani kriminal i Avdylajve” me zyrtarë të Partisë Socialiste për blerjen e votave në zgjedhjet parlamentare të qershorit të vitit 2017.
Në një deklaratë për shtyp nga selia blu, Sekretari i Përgjithshëm i PD-së, Gazment Bardhi, i është referuar artikujve të publikuar së fundmi në mediat ndërkombëtare, si: Reuters, EU Observer, Euroactiv, ku citohen zyrtarë të lartë evropianë që refuzojnë nisjen e bisedimeve të anëtarësimit të Shqipërisë në Bashkimin Evropian.
“Për fat të keq, janë vendet më me ndikim sot në Bashkimin Europian ato që kundërshtojnë hapjen e negociatave për Shqipërinë, për faktin e vetëm se Shqipëria drejtohet nga një qeveri dhe nga një kryeministër, që njihet në të gjithë Europën si kryeministri më i korruptuar, që ka blerë pushtetin në pakt me krimin e organizuar.”- u shpreh Bardhi.
Sekretari i Përgjithshëm i PD-së tha se kryeministri Edi Rama, bën pakt edhe me djallin për interesa personale dhe se këto përgjime po e detyrojnë të sajojë çdo marrëzi, për të larguar vëmendjen prej të vërtetës. “ Në përgjimet e gazetës gjermane Bild gjendet arsyeja përse Europa refuzon të pranojë në familjen e vet një vend, ku bandat dhe krimi i organizuar janë zotër të partisë në pushtet, Partisë Socialiste, blejnë vota dhe kërcënojnë kundërshtarët politikë për llogari të kryeministrit Edi Rama.”- theksoi Bardhi.
