Kryebashkiakët e Partisë Demokratike u janë përgjigjur thirrjes së kryeministrit Edi Rama, i cili u kërkoi që të mos bien pre e asaj që e quajti katërshe politike të opozitës (Basha, Berisha, Kryemadhi dhe Meta), por t’i referohen ligjit, pasi informuan Komisionin Qendror të Zgjedhjeve se do të zbatojnë dekretin e Presidentit të Republikës, Ilir Meta, për anulimin e 30 qershorit si datë të paracaktuar për zgjedhjet lokale.
Përmes një reagimi publik, krerët e bashkive të djathta, deklarojnë se kur kreu i shtetit të shpallë një datë të re zgjedhjesh, atëherë gatishmëria e tyre për respektimin e ligjit, do të jetë, si gjithmonë, maksimale. Në reagim shtohet se kryeministri është në paligjshmëri, pasi qeveria ka botuar në fletoren zyrtare dekretin e Presidentit dhe këto akte ligjore janë të detyrueshme.
REAGIMI I KRYEBASHKIAKËVE TË PD
Zoti Kryeministër! Je kokë e këmbë në paligjshmëri!
Qeveria e drejtuar prej teje ka botuar në Fletoren Zyrtare dekretin e Presidentit. Siç mund ta dish fare mirë, në Fletoren Zyrtare publikohen aktet ligjore të detyrueshme për zbatim në Republikën e Shqipërisë. Mos u lodh me urdhra pa vlerë që nxisin militantët e tu në KQZ të na kërcënojnë me ndjekje penale, sepse, për sa kohë nuk ekziston një datë zgjedhjesh, as zgjedhjet nuk ekzistojnë.
Kushdo që vepron ndryshe, është në paligjshmëri!
Zoti Kryeministër, kur Presidenti të shpallë një datë të re zgjedhjesh, atëherë gatishmëria jonë për respektimin e ligjit, do të jetë, si gjithmonë, maksimale.
Hallin e datës 30 nuk ta zgjidhim dot ne!
Je që je kot dhe sillesh nëpër Shqipëri si qyfyrexhi, jepi urdhër KQZ-së të shpallë menjëherë nisjen e negociatave me BE-në!
