Kryeministri Edi Rama u shpreh sot në Kuvend se po të ishte për interesat e tij personale zgjedhjet mund të shtyheshin pafundësisht. Më pas shtoi se shtetet demokratike kanë kushtetuta dhe ligje, funksionojnë me parimin e barazisë së të gjithëve para ligjit.
"Sikur zgjedhjet të shtyhen edhe në pafundësi do të isha ngushtësisht i interesuar, për mua personalisht, për rehatinë dhe karrigen time, por edhe për qeverinë tonë mund të isha i pari që hidhesha përpjetë nga guximi që Presidenti lëshoi një re kaq të madhe nga pantallonat mbi datën e zgjedhjeve. Laja duart e thosha: Bravo zoti President e punë e madhe se nisëm fushatën me firmën tuaj. Firma juaj na e hoqi dhimbjen e kokës e i bëjmë zgjedhjet kur të doni. Ose e kundërta ia lija fajin Ilirit e thosha jazëk të qoftë Zoti President! Ngrija duart para popullit e dilja burrë i urtë dhe i pafajëshm në këtë lojë politike. Sikur të isha siç dal tek filxhani i fallxhores, shpëtoja edhe unë bashkë me PS nga zgjedhje të tilla të mëtejshme, se me këtë budallallëk thoshim nuk duam zgjedhje vendore e as të përgjithshe se kemi informacione të sigurta për një sulm bërthamor që i kanoset Shqipërisë…Mirëpo shtetet demokratike kanë kushtetuta dhe ligje, funksionojnë me parimin e barazisë së të gjithëve para ligjit. Këto aventura mendore nuk mund t’i imponohen një populli të tërë. Sot ngrihet një grup, nesër një tjetër e ky vit i mbrapsht kadarejan vazhdonte kështu”,- tha Rama.
Rama akuzoi presidentin Meta se ka frikë nga drejtësia. Shtyrja e zgjedhjeve sipas tij do të jetë një e keqe e madhe me efekt të zgjatur mbi Shqipërinë.
“E keqja e këtyre zgjedhjeve nuk buron nga dëshira jonë por nga qëllimi i atyre që duan të vrasin zgjedhjet. Kjo e Presidentit ishte prova më ulëritëse e lepurit që fle në barkun e frikës jo vetëm nga zgjedhjet, por edhe nga drejtësia. Ne jemi të detyruar ta marrim përsipër këtë kosto që kostoja të mos i kalojë Shqipërisë së viteve të ardhshme. Shtyrja e zgjedhjeve për shkak se s’janë ata do ishte një e keqe e madhe me efekt të zgjatur mbi Shqipërinë”,- tha Rama.
