Policia vendosi të ndërhyjë për të kapur sasinë rekord të kokainës në Maminas, pasi nuk kishte kapacitetet për të mbajtur nën vëzhgim edhe më gjatë drogën, për të zbuluar porositësit. Falë ndërhyrjes së parakohëshme, është arrestuar vetëm shoferi i ngarkesës me kokainë.
Ky është përfundimi që arrin kronika e Top-Channel ditën e sotme, pasi i referohet burimeve nga prokuroria dhe policia.
Por, kronika zbulon edhe se policia kishte dashur të ndërhynte për kapjen e drogës tre ditë më parë, kur kamioni me banane e 613 kg kokainë ishtë në portin e Durrësit. Kishte qenë prokuroria që kishte insistuar që të shtyhej ndërhyrja, me qëllim zbulimin e personave që fshiheshin pas kësaj ngarkese, vlera e të cilës llogaritet në 180 milion euro.
"Por në fund edhe prokuroria është dorëzuar, duke bllokuar lëndën narkotike pas mbërritjes në magazinat e firmës, që kishte porositur ngarkesën e ligjshme.
Burimet u shprehën se kaq janë kapacitetet dhe se nuk mund të mbanin më tej nën vëzhgim një sasi të tillë droge të fortë.
Dhe ndoshta për këtë arsye në prangat e policisë kanë rënë vetëm shoferi i kamionit dhe shoqëruesit e ngarkesës së ligjshme." - mbyllet kronika e Top-Channel.
©LAPSI.AL
