25 vjeçarët Armando Pezaku dhe Donald Lushaj janë dy të arrestuarit e vetëm për 614 kilogram kokainë që u kap në Maminas.
Të dy punonjësit e kompanisë Arbri Garden janë marrë në pyetje nga policia, që ende nuk ka arritur të arrestojë Arbër Çekajn, administratorin e kompanisë që porosity kokainën në Kolumbi.
Armando Pezaku u bë i njohur në media për shkak se pyetjes mbi profesionin e tij në Facebook i ishte përgjigjur “u çoj miell partizanëve”. Batuta e implikon Pezakun sepse tregon se ai ka qenë në dijeni të aktivitetit të vërtetë të Arbri Garden. Në polici Pezaku nuk ka pranuar se kishte dijeni për drogën.
“Vetëm mora kamionin me ngarkesën. Më njoftuan se ngarkesa erdhi dhe shkova në port” ka thënë ai.
Njësoj si Pezaku është përgjigjur edhe 25 vjeçari tjetër Donaldo Lushaj: “Jam i punësuar nga kompania Arbri Garden. Jam i punësuar për t’u marrë me aktivitetin e kompanisë” mësohet të ketë thënë Lushaj që gjithashtu nuk ka pranuar asnjë implikim në trafikun e drogës.
