Ndaj ish prokurorit të Elbasanit, Dritan Gina ka nisur një hetim disiplinor. Dihet që Gina denoncoi publikisht vendimin e Arta Markut për ta shkarkuar nga detyra, madje bëri edhe një kallëzim penal, ku kërkoi ekzaminimin psiqik të kryeprokurores.
Refuzimi për të zbatuar urdhërin e Arta Markut është bërë shkak për nisjen e hetimit disiplinor ndaj Ginës, por në arsyetimin e prokurorisë, renditen edhe arsye të tjera. Ndër to janë akuzat publike të prokurorit se Arta Marku është “e ndikuar nga prapavijë politike” në vendimet e saj, shkruhet në dokumentin që siguroi Lapsi.al.
Në dokument bie në sy edhe hetimi për fjalë të tjera që ka thënë Gina si për shembull “dhënia e mendimit për veprimtarinë e organeve të tjera dhe drejtuesve të tyre (policinë e shtetit) me qëllim denigrimin e tyre” apo “cënimi i dinjitetit të koleges” janë arsyet, ku bazohet hetimi disiplinor ndaj Ginës.
Arta Marku u zgjodh me 69 votat e deputetëve të Partisë Socialiste dhe me kundërshtimin e fortë të Partisë Demokratike dhe Lëvizjes Socialiste për Integrim.
