Në takimin me pedagogët e senatit të Universitetit të Tiranës, kryeministri Edi Rama shpjegoi se një mosmarrëveshje mes Lindita Nikollës dhe Arben Ahmetajt u bë shkak për vonesën e rrogave të pedagogëve.
Duke pranuar se reforma ishte një sfidë edhe për vetë qeverinë, Rama pranoi se mosmarrëveshja pati kosto për pedagogët. Më pas kryeministri tha se rektori kishte bërë një deklaratë emocionale kur kishte thënë se vonesa e qeverisë ishte “kosto e bukës së gojës”.
“Na profesor, fol tani se ta zgjidha hallin e bukës së gojës” iu drejtua me cinizëm kryeministri, Rektorit të Universitetit të Tiranës Mynyr Konit ndërsa i kalonte mikrofonin për të folur.
Sapo mori fjalën, Rektori i Universitetit të Tiranës, Mynyr Koni tha se nuk kishte qenë ai që kishte thënë shprehjen “kosto e bukës së gojës”, por një pedagog tjetër.
Paga e muajit janar u vonua për 10 ditë për pedagogët për shkak se qeveria nuk kishte miratuar aktet nënligjore. Vonesa e pagës u bë shkak për një organizim të pedagogëve, që paralajmërojnë grevë të përgjithshme nëse nuk plotësohen kërkesat e tyre.
