Ndërkohë që protesta e opozitës u mbyll e qetë dhe pa incidente, Fatos Lubonja analizon protestën, pjesëmarrjen, fjalët e liderëve të politikës dhe mesazhet që ajo përcolli. Lubonja u shpreh se këto janë protesta militantësh, pasi një pjesë e mirë e populli që ka probleme nuk del në bulevard. Po ashtu Lubonja shtoi se duke e ditur se nuk e ke popullin me vete të mbetet të krijosh një protestë me 300 veta si Rama në 21 janar.
“Pjesëmarrja njësoj si e mëparshmja, cik më shumë, cik më pak, tregon një gjë që është evidente, që këto janë protesta militantësh, njerëzish të revoltuar të pjesës opozitare të organizuara, por nuk ka një pakënaqësi popullore të gjerë dhe një organizim që prej kohësh ka humbur në vend. Një pjesë e mirë e popullit që ka këto shqetësime nuk shkon aty që ta bëjë bulevardin të pëlcasë. Mendoj se zhgënjimet e së kaluarës me klasën politike, këto dhe njëlloj nënshtrimi i popullit shqiptar që e ka tradicional, bëjnë që të vijmë te këto situata të sforcuara. Duke e ditur që s’ke popullin me vete, popullin e zhgënjyer, të mbetet që të krijosh simulimin e një proteste me 300 vetë që bëri Rama në 21 Janar. Një popull i revoltuar shkatërron dhe rrëzon një qeveri. Po flasim për një revoltë të vërtetë popullore. Me këto lloj protestash, me këto lloj partish që kemi ne, që kanë një background qeverisje zhgënjyese nuk mund të ketë kollaj protesta nga ato që rrëzojnë dhe shkatërrojnë qeveri.” – u shpreh Lubonja.
