Këtë të dielë në Los Angeles do të mbahet ceremonia e 57-të e çmimeve Grammy. E ndërsa ditët kalojnë dhe artistët që do të performojnë në eventin muzikor më të rëndësishëm në botë, shtohen, ne po mendojmë për Bleonën. Këngëtarja shqiptare që jeton në Shtetet e Bashkuara, prej vitit 2010 shfaqet rregullisht në tapetin e kuq të kësaj feste.
Pjesëmarrja e Bleonës vitet e shkuara në Grammys ka qenë më se normale; me fustane të gjata dhe pamje krejt të zakonshme. Pavarsisht jehonës që i është bërë në mediat shqiptare për këto “arritje” të këngëtares, askush në Amerikë apo gjetkë, nuk pati shkruar ndonjëherë për potencialin e Bleonës, në tapetët e kuq.
Madje vjet, këngëtarja shqiptare, për pak sa, shpëtoi pa u vënë re! Po të mos ishte për Katy Perry-n, Bleona nuk do të rezultonte (në cep) në fotot zyrtare që qarkullojnë në internet, menjëherë pas përfundimit të parakalimit të yjeve në tapetin e kuq.
Por, “goditja” e mirëmenduar erdhi nëntorin e shkuar. Gjatë javëve të transmetimit të reality show-t “Euros of Hollywood”, ku Bleona shfaqej në televizionin Amerikan, ajo bëri një paraqitje thuajse nudo në American Music Awards. Kaq do të mjaftonte që objektivët dhe blicat e aparatëve fotografik, të drejtoheshin nga ajo dhe mediat e të gjithë botës, t’a vinin në qendër të vëmendjes.
Këngëtarja shqiptare, momentalisht, sipas të rejave që poston në Instagram, është duke xhiruar videon e saj të re. Duket se programi ku mori pjesë ka rezultuar i frytshëm dhe “lufta” në kërkim të famës amerikane është në rrugë të mbarë. Gjithashtu, fustani rrjetë ishte ‘shock’-ues dhe pas tij, jemi të bindur se kurioziteti për të mësuar se si do shfaqet Bleona të dielën në “Grammy Awards”, është shtuar!
