Egnatia nuk shkoi më shumë se një barazim 0-0 në ndeshjen e parë të playoff kundër Lillestrom, edhe pse pati rastet për të qenë në pozita më komode. Pikërisht mundësitë e shpenzuara, mbi të gjitha traversa e goditur nga Gruda kanë mërzitur teknikun e rrogozhinasve Nevil Dede, që e ka të qartë se e pret një ndeshje e komplikuar në Norvegji: “Mendoj që u treguam naivë. Zgjidhja do të ishte nëse një sy i mprehtë do t’i shihte gabimet në sulm. Për mua ishte diçka bazike, ose intepretimi ose keqkuptimi i djemve. Kujtonin që mund ta kalonin kundërshtarin me pasim në vijën e parë. Nuk ia dolëm”.
Tekniku nuk mund të ketë kohë të qetësohet, sepse në kampionat vjen Tirana para se të mendojë për kthimin me Lillestrom. Në këtë pikë, Dede nuk mund të mos përmendë ndryshimin e trajtimit të kësaj përballje nga Federatat: “Ato janë në javën e 25-të të kampionatit. Ne luajmë me Tiranën të dielën, kurse ata e kanë shtyrë ndeshjen, shihet sa e kanë vlerësuar. Do të mendojmë për Tiranën, pas Tiranës mendojmë sërish për ata. Kjo është pozitive, i shkon merita djemve dhe stafit”.
