Sirena spanjolle për Lautaro Martinez? Sipas asaj që raportohet në Spanjë dhe Argjentinë, Barcelona është gati të hidhet në sulm për kapitenin e Interit. Që blaugranat janë në kërkim të një sulmuesi nuk është diçka e re, ashtu siç nuk është e re as fakti se numri 10 i zikaltërve është prej kohësh një emër shumë i vlerësuar. Por le t’i marrim gjërat me radhë.
“100 milionë për El Toro”
Sipas asaj që raporton TNT Sport Argentina, pas “jo”-së kategorike të Atletico Madrid për Julian Alvarez, blaugranat do t’i kishin zhvendosur vëmendjen te kapiteni i Interit. “Nëse marrëveshja për Alvarez nuk zhbllokohet, ideja e Barcelonës do të ishte të ofronte 100 milionë për Lautaro Martinez”, janë fjalët e gazetarit sportiv Cristian Camiño. Një linjë e njëjtë ndiqet edhe në Spanjë, ku thuhet se “Toro” është një kërkesë e drejtpërdrejtë e Hansi Flick.
Kontakti në vitin 2020
Në verën e vitit 2020, katalanasit ishin përpjekur ta çonin “El Toro” në Barcelonë për ta bërë pasardhësin e Luis Suarez. Për sulmuesin argjentinas kishte garantuar figura simbol e blaugranave: Leo Messi. “Pleshti” nuk e kishte fshehur kurrë vlerësimin dhe mirëkuptimin në fushë me Lautaron, të cilin do ta kishte parë me shumë dëshirë në vend të “Pistoleros”: “Lautaro është një sulmues mbresëlënës, mbi të gjitha sepse mendoj se është shumë i kompletuar: është i fortë, driblon mirë, shënon, di ta mbrojë topin…”, ishin fjalët e Leos. Edhe atëherë, megjithatë, mes Interit dhe Barcelonës nuk u arrit kurrë finalizimi i marrëveshjes: diferenca në vlerësimin e lojtarit të lindur në vitin 1997 ishte shumë e madhe.
Lautaro në qendër të projektit Inter
Sot, gjashtë vjet më vonë, Lautaro është në qendër të projektit Inter: kapiten, një prej golashënuesve më të mirë në historinë e klubit, një element i pazëvendësueshëm për zikaltërit, të cilët e konsiderojnë të pashitshëm. Për këtë arsye, një transferim, aq më tepër 10 ditë para mbylljes së merkatos së verës, duket absolutisht i pamundur. Për t’i futur dyshime Interit do të nevojitej një ofertë krejtësisht jashtë tregut, si për zikaltërit (shumë përtej 100 milionëve për të cilat është folur), ashtu edhe për futbollistin. Edhe sepse vetë Lautaro, për momentin, nuk duket se dëshiron të ndryshojë ambient. “Shihemi të shtunën në San Siro”, ishte mesazhi në një prej postimeve të fundit të “Toros” në Instagram, i cili, për momentin, nuk duket i tunduar nga sirenat blaugrana.
