Princ Harry dhe Meghan Markle pritet të rikthehen në Mbretërinë e Bashkuar në fund të këtij muaji, për një periudhë më të gjatë se vizitat e tyre të zakonshme. Sipas burimeve, edhe dy fëmijët e tyre, Princi Archie dhe Princesha Lilibet, do të regjistrohen në një shkollë në Britani.
Lajmi është konfirmuar nga burime për Page Six, të cilat bëjnë me dije se Pallati Mbretëror është informuar për vendimin. Madje, sipas një prej burimeve, Mbreti Charles III është njoftuar të dielën për rikthimin e djalit të tij dhe familjes së tij në Britani.
“Charles është arsyeja pse ata po rikthehen”, ka deklaruar një burim.
Sipas tij, Mbreti, 77 vjeç, është i gatshëm të kalojë më shumë kohë me Harry-n, 41 vjeç, Meghan-in, 45 vjeç, si dhe me nipërit e tij.
Burimet theksojnë se nuk bëhet fjalë për një rikthim në detyrat mbretërore. Mbreti Charles vazhdon të mbajë qëndrimin se nuk do të ketë një situatë “gjysmë brenda, gjysmë jashtë” për anëtarët e familjes mbretërore. Sipas raportimeve, çifti do të vendoset në një rezidencë jo-mbretërore dhe do të vazhdojë aktivitetet e veta profesionale dhe bizneset private.
Rikthimi vjen më shumë se gjashtë vite pas vendimit të bujshëm të Harry-t dhe Meghan-it për t’u tërhequr nga rolet e tyre si anëtarë të lartë të familjes mbretërore. Në janar 2020, çifti njoftoi se do të hiqte dorë nga detyrat zyrtare dhe do të zhvendosej në Kaliforni. Vendimi u bë i njohur në mbarë botën si “Megxit”.
Pavarësisht rikthimit në Britani, marrëdhëniet me disa prej anëtarëve të familjes mbretërore mbeten të komplikuara. Harry dhe Meghan kanë folur vazhdimisht publikisht për përvojën e tyre brenda familjes mbretërore.
Në intervistën e famshme me Oprah Winfrey në vitin 2021, Meghan foli për vështirësitë që kishte përjetuar dhe për ndjenjën e izolimit. Harry, ndërkohë, bëri një sërë pretendimesh në kujtimet e tij, Spare, të publikuara në vitin 2023. Ai foli edhe për marrëdhënien e vështirë me vëllain e tij, Princin William.
Edhe pse Harry ka shprehur dëshirën për pajtim me familjen, marrëdhënia mes tij dhe William-it vazhdon të konsiderohet e tensionuar.
