Kryeministri Edi Rama ka reaguar me tone të ashpra ndaj deputetit Agron Shehaj për marrjen e një dokumenti të klasifikuar, duke përdorur akuza dhe etiketime të forta ndaj tij.
Përmes një reagimi publik, Rama e cilësoi atë si një “ballist” dhe “hajdut dokumentesh”, ndërsa tha se tentativa për t’u larguar me vrap i kujtoi, sipas tij, sjelljen e “ballistëve” që grabisnin pula.
Ai u shpreh se shpreson që Prokuroria të veprojë sipas ligjit ndaj personit në fjalë, ndërsa shprehu edhe keqardhje për sekretaren që, sipas tij, u përfshi në ngjarje dhe falënderoi Zotin që ajo nuk pësoi dëme serioze gjatë ndjekjes së Shehajt.
Postimi i Ramës:
"Ky tipi që vjedh një dokument të klasifikuar dhe ia fut vrapit, është një ballist që ngre dhe ul hajdut kë i del përpara, por siç e shihni sot tentoi të ikte me vrap njësoj si ballistët pasi hynin në kotec për të grabitur pula, duke na dëshmuar botërisht se vesi del me shpirtin.
Uroj po nuk shpresoj që prokuroria t’i tregojë vendin e përcaktuar nga ligji për grabitësit e dokumentave të klasifikuar kësaj sorre vjedhacake të mbushur me urrejtje, ndërkohë që i shpreh keqardhje vajzës së pafajshme duke falenderuar Zotin që shpëtoi pa dëme serioze nga rendja në panik pas hajdutit”.
