Cristiano Ronaldo dhe partnerja e tij prej shumë vitesh, Georgina Rodríguez, janë martuar zyrtarisht.
Ylli portugez i futbollit, 41 vjeç, dhe modelja 32-vjeçare kurorëzuan lidhjen e tyre në një ceremoni civile, më 11 gusht 2026 në Cascais të Portugalisë. Sipas njoftimit zyrtar, ceremonia ishte një moment “privat dhe intim”, ku të pranishëm ishin edhe pesë fëmijët e çiftit.
Lajmin e ka konfirmuar edhe vetë Ronaldo, i cili publikoi në Instagram një fotografi të duarve të çiftit, ku shihen unazat e martesës. Krahas fotos, futbollisti shkroi thjesht: “C❤️G”.
Martesa vjen saktësisht një vit pas fejesës së tyre. Më 11 gusht 2025, Georgina Rodríguez njoftoi në rrjetet sociale se Ronaldo i kishte propozuar martesë, duke publikuar një foto ku tregonte unazën e saj spektakolare me diamant në formë ovale.
“Sí, quiero. En esta y en todas mis vidas”, shkroi ajo në atë kohë.
Ronaldo dhe Rodríguez janë prindër të pesë fëmijëve: binjakëve Eva Maria dhe Mateo, 9 vjeç, vajzës Alana, 8 vjeç, vajzës Bella, 4 vjeç, si dhe Cristiano Jr., 16 vjeç, djalit që Ronaldo e ka nga një lidhje e mëparshme. Në prill të vitit 2022, çifti përjetoi një tragjedi familjare, pasi njoftoi humbjen e Ángel, vëllait binjak të Bellas, i cili ndërroi jetë menjëherë pas lindjes.
Ronaldo dhe Rodríguez u takuan për herë të parë në vitin 2017, kur Georgina punonte si asistente shitjesh në një dyqan Gucci. Në janar të atij viti, ata u shfaqën së bashku në tapetin e kuq të ceremonisë së “The Best FIFA Football Awards” në Zyrih.
Disa muaj më vonë, çifti e bëri lidhjen publike edhe në rrjetet sociale, kur Ronaldo publikoi një fotografi me Rodríguez. Në serialin e saj të Netflix, “I Am Georgina”, Ronaldo ka folur për fillimet e marrëdhënies së tyre.
Ai e përshkroi Georginën si një vajzë “shumë interesante” dhe më të pjekur për moshën e saj, ndërsa pranoi se nuk e kishte imagjinuar se do të binte kaq shumë në dashuri me të.
“Nuk e mendoja në fillim se lidhja do të bëhej kaq e fortë, se do të dashurohesha me të. Nuk e prisja, sinqerisht. Por pas njëfarë kohe, ndjeva se ajo ishte gruaja e jetës sime”, është shprehur Ronaldo.
