The Weeknd duket se ka ndryshuar mendim lidhur me planet për të tërhequr emrin e tij artistik.
Në pamje të publikuara nga fansat në rrjetin X nga koncerti i tij në Stokholm të shtunën, më 8 gusht, këngëtari i njohur i R&B, emri i vërtetë i të cilit është Abel Tesfaye, i tregoi publikut pse nuk do të heqë dorë nga emri “The Weeknd”, siç kishte lënë të kuptohej në fillim të vitit 2025.
“E provova pak pensionimin dhe nuk më pëlqen se si ndihet. Do të jem këtu përgjithmonë me ju,” tha 36-vjeçari mes brohorimave të publikut.
Në maj të vitit 2025, The Weeknd kishte folur për revistën People për idenë e tërheqjes së emrit të tij artistik.
“A kam filluar? Po, po shkon drejt asaj. Por jam në turne tani, kështu që nuk mund ta tërheq plotësisht ende,” ishte shprehur ai në atë kohë.
Artisti kishte treguar më herët për Variety se humbja e zërit gjatë një koncerti në Los Angeles në vitin 2022 e bëri të ndihej “i mposhtur” dhe e shtyu të vinte në dyshim figurën e tij publike.
“E kuptova që duhej të ndalesha dhe të kuptoja jetën time. Të përballesha me atë që ndodhi, të mësoja diçka të re dhe të nisja sërish,” kishte thënë ai, duke zbuluar se përjetoi një lloj krize mendore që frymëzoi albumin e tij të ri.
Sipas këngëtarit, kjo përvojë ndikoi edhe në dëshirën për të lënë pas emrin “The Weeknd”.
“Një pjesë e imja mendonte: ‘E humbe zërin sepse ka mbaruar; the gjithçka që kishe për të thënë. Mos qëndro më gjatë në festë — mund ta mbyllësh tani dhe të jetosh i lumtur’,” tregoi ai.
Megjithatë, edhe atëherë, The Weeknd sqaroi se nuk kishte ndërmend të largohej nga muzika.
“Nuk besoj se mund ta ndal së bëri muzikë. Por çdo gjë duhet të ndihet si një sfidë. Dhe për mua, tani, The Weeknd — çfarëdo që të jetë ai — është zotëruar tashmë,” përfundoi artisti.
