Britania e Madhe ka regjistruar 2.877 vdekje gjatë valëve të të nxehtit në muajt maj dhe qershor të vitit 2026, gati dy herë më shumë se numri i raportuar gjatë gjithë verës së vitit 2025.
Të dhënat paraprake janë publikuar nga Agjencia e Sigurisë Shëndetësore e Mbretërisë së Bashkuar (UKHSA), e cila vlerëson se temperaturat ekstreme kanë pasur ndikim të drejtpërdrejtë në shëndetin e mijëra personave.
Sipas raportit, rreth 753 vdekje u lidhën me valën e të nxehtit nga 24 deri më 27 maj, ndërsa 124 vdekje të tjera u regjistruan gjatë periudhës së temperaturave të larta nga 21 deri më 28 qershor.
UKHSA thekson se, edhe pse shifrat janë ende paraprake, ato po i afrohen rekordit vjetor të regjistruar në vitin 2022, kur temperaturat ekstreme shkaktuan numrin më të lartë të vdekjeve të lidhura me të nxehtin në vend.
Vala e të nxehtit në qershor zgjati tetë ditë dhe solli lëshimin e alarmit më të lartë shëndetësor për temperaturat ekstreme në Angli. Ky ishte vetëm rasti i dytë kur u aktivizua niveli maksimal i alarmit, duke reflektuar kushtet e pazakonta meteorologjike.
Muajt maj dhe qershor thyen gjithashtu rekorde të temperaturave mujore të regjistruara nga Zyra Meteorologjike britanike. Në Kew Gardens temperatura arriti 31.5°C më 26 maj, ndërsa në Lingwood, Norfolk, u regjistruan 37.7°C më 26 qershor.
Autoritetet shëndetësore kanë nënvizuar rëndësinë e sistemeve të paralajmërimit të hershëm për valët e të nxehtit, të cilat synojnë të informojnë qytetarët dhe institucionet për rreziqet që temperaturat ekstreme paraqesin për shëndetin.
Ekspertët paralajmërojnë se grupet më të prekshme, përfshirë të moshuarit, personat me sëmundje kronike dhe ata që jetojnë në zona urbane me temperatura më të larta, mbeten më të rrezikuarit gjatë periudhave të motit ekstrem.
