Një skemë e dyshuar falsifikimi dokumentesh për përfitimin e pasaportave bullgare është goditur nga autoritetet në Dibër. Sipas burimeve nga hetimi, disa persona dyshohet se përgatisnin dokumente të rreme të gjendjes civile, duke i paraqitur individët si banorë të njësisë administrative Ostren. Këto dokumente më pas dërgoheshin në Bullgari, me qëllim pajisjen e tyre me shtetësi dhe pasaportë.
Operacioni i koduar “Identiteti” çoi në ndalimin e një 49-vjeçari me banim në Sofje, i cili u kap në dalje të Pikës së Kalimit Kufitar Bllatë. Janë vënë nën procedim penal edhe dy zyrtarë lokalë të njësisë administrative Ostren, njëri aktualisht në detyrë dhe tjetri ish-administrator. Ata dyshohet se kanë shpërdoruar funksionin, duke lëshuar dokumente në kundërshtim me ligjin. Hetimet janë ende në zhvillim.
