Tregu i punës në Shqipëri ka mbyllur vitin 2025 me sinjale pozitive në terma vjetorë, por sektorët e prodhimit bujqësia dhe industria shënuan rënie të fortë të normave të punësimit.
Sipas të dhënave zyrtare nga INSTAT shkalla e pjesëmarrjes në forcat e punës për popullsinë 15-64 vjeç arriti në 75,9%, duke me rritje prej 0,4 pikë përqindjeje krahasuar me të njëjtën periudhë të vitit paraardhës, rritje kjo që tregon një angazhim më të lartë të qytetarëve në tregun e punës.
Papunësia ka pësuar një rënie inkurajuese në nivel vjetor, duke zbritur në 8,3% për popullsinë 15 vjeç e lart, çka përbën një përmirësim prej 0,5 pikë përqindjeje në raport me fundin e vitit 2024. Megjithatë, dinamika e brendshme e tregut brenda vitit 2025 tregon një rritje të lehtë të numrit të të papunëve me rreth 0,2 pikë përqindjeje krahasuar me tremujorin paraardhës, që përkon me luhatjet e zakonshme të periudhës së dimrit.
Sa i përket punësimit, shkalla e tij për popullsinë 15 vjeç e lart arriti në 58,5% në fund të vitit 2025. Ky tregues ka shënuar rritje vjetore me 0,9 pikë përqindjeje, duke konfirmuar krijimin e vendeve të punës gjatë gjithë vitit. Edhe në këtë rast, tendenca afatshkurtër tremujore shfaqi një tkurrje modeste prej 0,3 pikë përqindjeje, duke reflektuar stabilizimin e tregut pas fluksit maksimal të aktivitetit ekonomik që zakonisht arrihet gjatë muajve të verës dhe vjeshtës së parë.
Sektori i shërbimeve mbetet motori kryesor i ekonomisë, duke regjistruar një rritje vjetore mbresëlënëse prej 5,6%, çka tregon po tregon orientim të punësimit drejt tregtisë, turizmit dhe teknologjisë.
Në kahun tjetër, bujqësia po përballet me goditjen më të rëndë, duke regjistruar një rënie vjetore prej 9,7% të të punësuarve. Ky trend tregon një braktisje masive të aktivitetit bujqësor, megjithëse një rritje e lehtë prej 1,2% gjatë tremujorit të fundit mund të reflektojë punët intensive të vjeljeve të vjeshtës.
Gjithashtu edhe industria vijoi rënien e mëtejshme të te punësuarve me -0.7 % në krahasim me tremujorin e fundit 2024./ Monitor
