Reperja e njohur Cardi B ka reaguar pas raportimeve se ajo ka shkatërruar pajisje në prapaskenë gjatë paraqitjes së saj si e ftuar muzikore në emisionin “Saturday Night Live” më 31 janar.
Sipas një raporti të TMZ, artistja 33-vjeçare dyshohet se është zemëruar pasi ka dëgjuar një batutë që ekipi i emisionit po planifikonte të transmetonte gjatë episodit, e cila lidhej me Nicki Minaj dhe përkatësinë e saj me lëvizjen MAGA të Donald Trump.
Burime për median amerikane pretendojnë se pasi dëgjoi shakanë, Cardi filloi të shfaqte nervozizëm, duke hedhur telefonin drejt një monitori në prapaskenë dhe duke kërcënuar se nuk do të performonte. Madje, sipas të njëjtave burime, ajo hyri në zyrën e një producenti dhe goditi një ekran që më pas u zëvendësua.
Në fund, batuta për Nicki Minaj – e cila pritej të transmetohej gjatë segmentit “Weekend Update” me Colin Jost dhe Michael Che – u hoq nga skenari, ndërsa Cardi B performoi siç ishte planifikuar.
Pak orë pasi lajmi u publikua, Cardi reagoi në platformën X me një mesazh që u interpretua si përgjigje ndaj akuzave:
“Hmmm, gjithë këto histori të vogla rastësore… le të flasin,” shkroi ajo.
Debati mori një tjetër kthesë kur Alex Bruesewitz, këshilltar i lartë i ish-presidentit Donald Trump, shpërndau raportin dhe komentoi në mënyrë ironike për situatën. Një llogari fansash e Cardi B sugjeroi se përfshirja e tij nuk ishte rastësi, duke e lidhur me raportet e mëhershme për Nicki Minaj dhe qëndrimet e saj politike.
Kujtojmë se marrëdhënia mes Cardi B dhe Nicki Minaj ka qenë e tensionuar prej vitesh. Dy artistet bashkëpunuan në këngën “MotorSport” në vitin 2017, por më pas u përfshinë në një seri përplasjesh publike, përfshirë edhe një incident fizik në vitin 2018. Rivaliteti i tyre u rindez sërish në shtator, me akuza dhe kundërpërgjigje në rrjetet sociale.
