Detaje të reja kanë dalë në dritë nga vrasja e shqiptaro-ekuadorianit Artur Tushi, 44 vjeç, i cili u qëllua me armë zjarri, 11 herë jashtë qendrës tregtare Santafé në Kolumbi.
Hetuesit kanë identifikuar autorët e sulmit, të cilët dyshohet të jenë pjesë e grupit kriminal “La Oficina Premium”, i cili synon persona të huaj me status të lartë në Medellin dhe qytete të tjera të Kolumbisë.
Vrasja e Tushit dyshohet të lidhet me trafikun e qenieve njerëzore dhe narkotikëve, ku përfshihen bandat kriminale shqiptare, ekuadoriane dhe kolumbiane. Viktima u qëllua teksa po kthehej në shtëpinë ku qëndronte, në një atentat të planifikuar për të eliminuar aktivitetin e tij kriminal.
Sipas raportimeve, ky rast është pjesë e një serie katër vrasjesh të të huajve në Medellín gjatë viteve të fundit. Viktimat e tjera përfshijnë një meksikan, një amerikan dhe dy kanadezë.
Një nga viktimat është Horacio Pérez Ledezma, 54 vjeç, tregtar meksikan, i vrarë në një restorant në sektorin Provenza të El Poblado.
Ndërsa kanadezët e vrarë janë Jonathan Christopher Acevedo García dhe Jesse Marcel Arrigo, të cilët u qëlluan respektivisht në Mall del Indio dhe pranë Las Palmas Avenue. Viktimat amerikane nuk janë bërë publike nga autoritetet.
Sipas kryetarit të bashkisë, Federico Gutiérrez, kjo organizatë kriminale operon ndërkombëtarisht dhe dyshohet se qëndron pas vrasjeve edhe në Meksikë, Republikën Dominikane dhe Kili.
Hetimet kanë zbuluar përdorimin e linjave telefonike ndërkombëtare, dokumenteve dhe rrjeteve financiare për të fshehur aktivitetin e tyre, përfshirë pagesa në parajsa fiskale dhe kriptovaluta.
Hetuesit zbuluan gjithashtu se anëtarët e grupit kryenin rituale ezoterike përpara kryerjes së krimeve, duke sakrifikuar të paktën katër dhi dhe duke regjistruar ritualet për t’i bindur klientët për efektivitetin e veprimeve të tyre.
Nëntë të ndaluarit e grupit janë nën hetime për vrasje, trafikun e armëve dhe aktivitete të tjera kriminale, ndërsa autoritetet vijojnë hetimet për të zbardhur të gjitha lidhjet ndërkombëtare dhe implikimet penale të strukturës së “La Oficina Premium”
