Drejtësia belge nuk i ka mbyllur ende hesapet me dosjen “Toyota Yaris”, e njohur për 3.5 milionë eurot që u sollën në vendin tonë në 2019-ën të fshehura në makina të tilla. Makinat me paratë e fshehura u nisën nga Belgjika dhe për to, në vendin tonë u dënua me vetëm 1 vit burg, vetëm Ervis Vladi.
Mediat belge raportojnë se Gjykata Penale e Brukselit ka shpallur moskompetencën për të gjykuar këtë dosje, “një skandal që përfshin botën kriminale dhe atë politike në Shqipëri”, citohet në shkrim.
Dosja ishte ndjekur nga Prokuroria Federale e cila ka hetuar paratë “që me shumë gjasë vinin nga veprimtari kriminale e rrjeteve belgo-shqiptare”. Çështja bëri bujë në Shqipëri pasi Lulzim Basha në atë kohë kryetar i PD, foli për to në parlament 3 ditë para se makinat të mbërrinin në Shqipëri duke akuzuar si të lidhur me këtë çështje Taulant Ballën.
“Një delegacion i Prokurorisë Federale udhëtoi në Shqipëri për të marrë në pyetje disa persona të përfshirë në këtë çështje, mes tyre edhe ish-ministrin shqiptar të Punëve të Jashtme, Lulzim Basha. Ky i fundit nuk është marrë i pandehur nga prokuroria belge. Në Belgjikë janë akuzuar 13 persona, të cilët janë nxjerrë përpara drejtësisë në Bruksel.
Çështja konsiderohet jashtëzakonisht e ndjeshme, pasi shihet si një provë paraprake për anëtarësimin e Shqipërisë në Bashkimin Evropian, një vend i goditur nga korrupsioni. Ky skandal ka njollosur gjithashtu edhe gjyqësorin shqiptar.
Gjykata Penale vlerëson, ndër të tjera, se dosja nuk lejon të përcaktohet as koha, as vendi se ku janë futur paratë e dyshimta në skutat e automjeteve. Kamioni, në fakt, ka kaluar nëpër disa shtete para se të sekuestrohej nga autoritetet shqiptare. Prokuroria Federale ka ende mundësinë të bëjë apel kundër këtij vendimi” – shkruan media belge DHNet. ©LAPSI.al
