Policia e Tiranës njoftoi një operacion të Komisariatit të Policisë Nr.2 ku në pranga ka rënë një grabitës i sendeve në automjete. Pas denoncimeve nga disa drejtues makinash për vjedhjen e materialeve dhe sendeve të një vlere të konsiderueshme nga automjetet e tyre apo subjekte policia tha se u vu në lëvizje duke organizuar operacionin policor të koduar “The thief”.
Në pranga u vu Geraldo Zeneli, 34 vjeç dhe Gëzim Cani, 48 vjeç, të dy banues në Tiranë. Nga hetimet u zbulua se 34-vjeçari në muajt korrik, tetor dhe nëntor ka vjedhur materiale dhe sende të ndryshme në 5 automjete dhe 1 subjekt që iu ka thyer xhamat, në lagje të ndryshme, të cilat më pas ja shiste Canit. Ndërsa në 20 dhe 29 nëntor Zeneli ka vjedhur 2 biçikleta.
Në videon më lart dëgjohet që gjatë momentit të arrestimit i riu që u drejtohet efektivëve të policisë që e filmojnë: "Do na nxirrni te lajmet sot?"
“Gjatë kontrollit të banesës së 48-vjeçarit, shërbimet e Policisë e sekuestruan disa prej materialeve të vjedhura. Vijojnë hetimet për zbardhjen e vjedhjeve të tjera që mund të ketë kryer nga 34-vjeçari. Materialet procedurale i kaluan Prokurorisë, për veprime të mëtejshme” – thuhet në njoftimin e policisë. ©LAPSI.al
