Në një rrëfim tronditës në podcastin “On Purpose” me Jay Shetty, Madonna zbuloi se ka kaluar një periudhë të errët emocionale gjatë betejës ligjore për kujdestarinë e djalit të saj, Rocco Ritchie, në vitin 2016.
"Ka pasur momente në jetën time kur kam dashur t’i pres duart,” u shpreh artistja 67-vjeçare. “Në fakt, kam menduar për vetëvrasje. Mund të tingëllojë e çuditshme nga unë sepse nuk jam tipi ‘emo’… por thjesht nuk mund ta përballoja më atë dhimbje.”
Këngëtarja e hitit “Like a Virgin” rrëfeu se ishte një nga periudhat më të dhimbshme të jetës së saj, sidomos kur djali i saj adoleshent nuk dëshironte të jetonte me të në Nju Jork.
“Edhe pse martesa ime nuk funksionoi, dikush që përpiqet të më marrë fëmijën… ishte sikur të më vrisnin,” tha ajo mes emocionesh.
Madonna dhe regjisori britanik Guy Ritchie, të cilët ishin të martuar nga viti 2000 deri në 2008, kishin dy fëmijë së bashku – Rocco, tani 25 vjeç, dhe vajzën Lourdes Leon, 28 vjeç.
Ndërsa ishte në turneun “Rebel Heart”, Madonna kujton se shpeshherë binte në dysheme të dhomës së zhveshjes dhe shpërthente në lot, ndërkohë që duhej të përballej me një publik prej mijëra njerëzish çdo natë.“Vetëm qaja. Mendoja se ishte fundi i botës,” shtoi ajo. “Por, faleminderit Zotit, nuk ndihem më ashtu.”
Këngëtarja tregoi se rrugëtimi i saj shpirtëror e ka ndihmuar ta përballojë dhimbjen dhe sfidat, duke i parë ato tani si mësime, jo si ndëshkime.
“Dikur kërkoja hakmarrje ndaj atyre që më kishin lënduar,” pranoi Madonna. “Por tani nuk jam më në atë lojë faji.”
Beteja për kujdestarinë filloi në dhjetor 2015, kur Rocco refuzoi të kthehej nga Londra në Nju Jork për të kaluar festat me nënën e tij. Edhe pse një gjykatës urdhëroi kthimin e tij në SHBA, Rocco zgjodhi të qëndronte me të atin në Mbretërinë e Bashkuar.
Në shtator të vitit 2016, Madonna dhe Guy Ritchie arritën një marrëveshje për kujdestarinë.
