Pas një viti të vështirë të mbushur me ulje-ngritje emocionale, Katy Perry ka reflektuar publikisht për herë të parë mbi ndarjen nga ish-i fejuari Orlando Bloom dhe përjetimet personale që e kanë shoqëruar.
Këngëtarja e hitit “Teenage Dream” publikoi një mesazh prekës në Instagram të martën, me rastin e njëvjetorit të daljes së albumit të saj “143”, duke iu drejtuar fansave të saj besnikë, “KatyCats”.
“Ju e dini që nuk jam shumë për postime përvjetorësh,” shkroi ajo. “Por do të ishte e papërgjegjshme të mos e pranoja ndikimin e jashtëzakonshëm që ka pasur ky vit tek unë.”
40-vjeçarja e përshkroi albumin si një histori dashurie për fansat e saj, duke theksuar se vitin e fundit e ka kaluar si një “rollercoaster”, me fitore, humbje dhe mësime të mëdha.
“Ne, macet (dhe minjtë), kemi kaluar një rollercoaster, por kudo që na çoi ky udhëtim, kemi qenë bashkë,” shkroi Perry. “Jam krenare për veten, për ju dhe për komunitetin që kemi ndërtuar.”
Në postimin e saj, këngëtarja foli edhe për përballjen me pyetjen nëse e do veten, duke thënë: “Çdo ditë më jepet mundësia t’i përgjigjem kësaj pyetjeje. Sot, përgjigjja është: Po.”
Katy Perry dhe Orlando Bloom, të cilët ishin së bashku gati 10 vite dhe janë prindër të një vajze 5-vjeçare, Daisy Dove, konfirmuan ndarjen e tyre në qershor 2025. Ata deklaruan se janë ndarë miqësisht, duke theksuar se prioriteti i tyre mbetet bashkëprindërimi me dashuri dhe respekt.
Orlando, 48 vjeç, foli për ndarjen në shtator, duke u shprehur:
“Jam mirënjohës për gjithçka që kemi kaluar. Nuk kemi asgjë tjetër veç dashuri për njëri-tjetrin.”
Këngëtarja, e cila ndodhet në turin ndërkombëtar “The Lifetimes Tour”, përfundoi mesazhin e saj me një shprehje besimi për të ardhmen:
“Nuk po e kontrolloj më rrjedhën e gjërave. Po i besoj engjëjve, fansave dhe muzikës që të më çojnë atje ku duhet. Ju lutem ta dini këtë: dashuria ime për ju është e pakushtëzuar. Asgjë nga kjo nuk do të ishte e mundur pa ju.”
