Festivali më i madh i muzikës në botë, Coachella, ka publikuar zyrtarisht line-up-in për vitin 2026. Eventi do të mbahet në dy fundjava, nga 10 deri më 12 prill dhe nga 17 deri më 19 prill, në Indio, Kaliforni.
Pas një performance në Coachella 2024, këngëtarja e hitit “Espresso”, Sabrina Carpenter, do të ngjitet këtë vit në skenën kryesore si headliner e së premtes. Ajo do të shoqërohet nga Ethel Cain, Teddy Swims, KATSEYE, The XX, Turnstile dhe shumë të tjerë.
Justin Bieber, i cili ndër vite ka bërë paraqitje surprizë në festival, këtë herë do të jetë headliner i së shtunës, ku do të performojë setet e tij SWAG dhe SWAG II. Në të njëjtën ditë, do të ngjiten në skenë edhe The Strokes, Addison Rae, Sombr dhe David Byrne.
Të dielave, Karol G do të jetë ajo që do të mbyllë të dyja fundjavat e festivalit, me një performancë që pritet të jetë elektrizuese. Ajo do të shoqërohet nga artistë si Young Thug, Laufey, Iggy Pop, FKA Twigs dhe Wet Leg.
Një tjetër risi këtë vit është kampimi në grup, i cili do të lejojë grupe prej 10 vetash apo më shumë të qëndrojnë bashkë në hapësira të dedikuara, duke e bërë eksperiencën edhe më sociale.
Si gjithmonë, festivali do të tërheqë jo vetëm artistë, por edhe shumë personazhe të njohur. Në vitin 2024, Taylor Swiftdhe Travis Kelce patën një nga paraqitjet më ikonike si çift, duke ndjekur performancat e shoqeve të saj Ice Spice dhe Bleachers.
Ndërkohë, Kardashians dhe Vanessa Hudgens vazhdojnë të konsiderohen si ikonat e stilit të Coachella-s. “Është çfarëdo që më pëlqen atë vit,” tha Vanessa në një intervistë të mëparshme. “Festivali është vendi ideal për t’u shprehur pa gjykime.”
