Taylor Swift ka mohuar se ka rënë dakord të dëshmojë në betejën ligjore mes aktores Blake Lively dhe Justin Baldoni, duke deklaruar se nuk ka asnjë rol të rëndësishëm në këtë çështje.
Në një letër zyrtare të dorëzuar në gjykatë më 12 shtator, avokati i Swift, Doug Baruch nga kompania ligjore Venable LLP, thekson se këngëtarja “nuk ka pranuar të japë dëshmi” dhe se “nuk ka asnjë rol material” në procesin gjyqësor.
“Klientja ime nuk ka rënë dakord të deponohet,” thuhet në letër, “por nëse detyrohet ligjërisht, ne njoftuam (vetëm pasi dëgjuam për këtë kërkesë tri ditë më parë) se ajo mund të jetë e disponueshme gjatë javës që fillon më 20 tetor.”
Letra e Swift vjen si përgjigje ndaj një padie nga ekipi ligjor i Blake Lively, e cila kërkon që gjykatësi të refuzojë kërkesën e Baldoni-t për zgjatjen e afatit të hetimeve gjyqësore, me qëllim që të ketë kohë të marrë në pyetje Swift.
Avokatët e Lively e quajtën përpjekjen “të papranueshme” dhe pjesë të një strategjie të drejtuar nga media.
“Pala e Baldoni-t po përpiqet vazhdimisht të përfshijë Taylor Swift në këtë proces për të fituar vëmendje publike,” thuhet në dokumentin e padisë. “Ata nuk kanë paraqitur asnjë arsye të vlefshme ligjore për ta bërë këtë.”
Lively thekson se kjo nuk është hera e parë që Baldoni kërkon të përfshijë Swift: një thirrje zyrtare (subpoena) ishte lëshuar në maj, por më pas u tërhoq — me shumë bujë në media.
Tani, pala e Baldoni-t pretendon se Swift ka pranuar të dëshmojë, por vetëm pas datës 20 tetor për shkak të angazhimeve profesionale, përfshirë promovimin e albumit të saj të 12-të “The Life of a Showgirl”, që publikohet më 3 tetor.
Procesi gjyqësor ka nisur në dhjetor 2024, kur Blake Lively paditi Justin Baldoni dhe kompaninë e tij Wayfarer Studios, duke e akuzuar për ngacmim seksual dhe hakmarrje profesionale gjatë xhirimeve të filmit It Ends With Us.
Baldoni i ka mohuar të gjitha akuzat dhe ka paraqitur një kundërpadi (tashmë e rrëzuar), ku pretendonte se Taylor Swift dhe Ryan Reynolds (bashkëshorti i Lively) kanë ushtruar presion mbi të për të pranuar ndryshime në skenar, gjatë një vizite në apartamentin e tyre në New York.
