Selena Gomez ka treguar për herë të parë historinë e miqësisë së saj me Taylor Swift, gjatë një interviste të fundit në podkastin “Therapuss”.
Aktorja dhe këngëtarja 33-vjeçare zbuloi se ajo dhe Taylor janë njohur kur të dyja po takoheshin me djemtë e grupit Jonas Brothers.
“Isha me Nick [Jonas], dhe ajo me Joe [Jonas],” kujtoi Selena me buzëqeshje. “Ishim shumë të reja. Nuk kishim asnjë ide çfarë po bënim.”
Selena tregon se ajo ishte vetëm 15 vjeç, ndërsa Taylor 18, dhe që nga ajo kohë nisi një miqësi që zgjat edhe sot e kësaj dite.
“Ne themi shpesh që gjëja më e mirë që kemi marrë nga ato marrëdhënie ishim ne për njëra-tjetrën,” tha ajo.
Swift dhe Joe Jonas u ndanë në vitin 2008, po ashtu edhe Selena me Nick, edhe pse ata u ribashkuan shkurtimisht në 2010. Pavarësisht ndarjeve, Selena tha se të gjithë janë ende në marrëdhënie të mira: “Të gjithë e njohim dhe e duam njëri-tjetrin akoma.”
Sipas saj, ato u bënë të pandashme duke kaluar së bashku edhe ndarjet e para romantike.
“Siç bëjnë vajzat. Dhe pastaj, nuk e di, thjesht qëndruam bashkë nëpër të gjitha ulje-ngritjet që pasuan. Dhe ja ku jemi, 16 vite më pas.”
Selena kujtoi gjithashtu momentin kur Taylor i luajti për herë të parë këngën e saj hit “Love Story”, që besohet gjerësisht se është shkruar për Joe Jonas. “Isha në një dhomë hoteli dhe e mbaj mend shumë mirë. Sapo e dëgjova, mendova: ‘Kjo është një nga këngët më të bukura që kam dëgjuar ndonjëherë.’”
Selena Gomez e përshkroi Swift si një “kameleon të jashtëzakonshëm” dhe shprehu mirënjohje për mbështetjen që kanë pasur për njëra-tjetrën në çdo etapë të jetës.
Ndërkohë, në të njëjtin episod, Gomez foli edhe për lidhjen e saj me producentin Benny Blanco, me të cilin është e fejuar prej vitit 2024. Ajo rrëfeu se e ka njohur që në moshën 16-vjeçare, por nuk ishte koha e duhur atëherë.
Tani, çifti është në pritje të dasmës, edhe pse Selena shton se kanë ende projekte personale për të përfunduar para se të hyjnë në “detajet e vogla”.
