Një anije me 280 persona shpërtheu në flakë pranë brigjeve të Indonezisë, duke i detyruar pasagjerët e tmerruar të hidheshin në det të veshur me jelekë shpëtimi. Deri tani raportohet për 5 viktima.
Momentet tragjike u fiksuan nga kamerat e telefonave celularë dhe qarkulluan në mediat sociale.
Pamjet tregojnë zjarrin e madh dhe një re të dendur tymi që ngrihet në qiell. Zjarri shpërtheu në anijen KM Barcelona, e cila po operonte në itinerarin Manado -Tahunda këtë të diel rreth orës 13:30 sipas kohës lokale.
Pasagjerët filluan të bërtisnin nga paniku dhe të qanin nga frika. Të gjithë veshën jelekët e shpëtimit dhe me ndihmën e ekuipazhit u hodhën në det. Fotografitë dhe pamjet filmike kapën shumë prej tyre duke lundruar në ujë, në përpjekje për t’u larguar nga anija që po digjej.
Një video tjetër tregon një fëmijë të vogël që shpëtohet nga një burrë, i cili rrëfen incidentin e pabesueshëm. Ai e mban në krahë fëmijën e vogël që kollitet. Shkaku i zjarrit është ende i panjohur. Tre anije shpëtimi nxituan në vendngjarje. ©LAPSI.al
