Aktori i njohur i filmit “Joker”, Joaquin Phoenix, ka shprehur keqardhje të thellë për intervistën famëkeqe që pati me David Letterman mbi 15 vite më parë.
Duke folur në emisionin “The Late Show with Stephen Colbert” këtë të martë, Phoenix e kujtoi me turp paraqitjen e tij të çuditshme në studion e njëjtë në Nju Jork në vitin 2009.
Në atë kohë, Phoenix po promovonte filmin dokumentar “I’m Still Here”, ku ai shtirej sikur kishte lënë aktrimin për t’u bërë reper.
Gjatë intervistës me Letterman, aktori u shfaq në karakterin e tij të trilluar dhe solli një sjellje tejet të çuditshme dhe të pazakontë.
“Në fillim bëra intervistën paraprake në karakter, por e kuptova që ishte paksa qesharake,” tregoi Phoenix për Colbert. “I telefonova dhe u thashë: ‘Ja çfarë po bëj. Do vij në studio dhe do jem krejtësisht në këtë karakter. Dua që Dave të më ‘masakrojë’. Doja që të ishte një situatë e rrezikshme dhe e parehatshme.”
Phoenix pranoi se intervista ishte e tmerrshme dhe e pakëndshme. “Pendohem. Nuk do ta bëj kurrë më. Më vjen shumë keq,” u shpreh ai me ndjeshmëri.
Colbert, duke e kujtuar intervistën, tha se për të ishte “televizion i shkëlqyer”, ndërsa Phoenix bëri shaka duke thënë: “E imagjinoj që kanë bërë një ekzorcizëm të madh pasi dola nga studioja.”
Aktori fitues i çmimit Oscar theksoi se, ndonëse e gjithë situata ishte një lloj suksesi artistik, personalisht për të mbeti një përvojë traumatike. “Ishte një sukses në njëfarë mënyre,” tha ai. “Por gjithashtu një nga netët më të këqija të jetës sime.”
Phoenix kishte kërkuar falje edhe në vitin 2010 gjatë një rikthimi në emisionin e Letterman. “Shpresoj të mos ju kam ofenduar në asnjë mënyrë,” i tha ai atëherë, duke shtuar: “E kuptova që ju keni intervistuar shumë njerëz dhe mendova se do ta dinit dallimin mes një personazhi dhe një njeriu të vërtetë.”
Por Letterman nuk ishte ofenduar aspak, duke i thënë Phoenix: “Ishte aq argëtuese.”
