Reperi nga Gjilani, Feronit Shabani i njohur si Fero, është zyrtarisht i akuzuar nga Prokuroria Themelore në Gjilan për tri vepra penale të rënda: dhunë në familje, ngacmim seksual dhe kanosje.
Sipas aktakuzës, Fero dyshohet se ka ushtruar dhunë psikologjike ndaj ish-bashkëshortes së tij, modeles Arbenita Ismajli, në periudhën qershor–tetor 2024. Ai akuzohet për sjellje kërcënuese, përfshirë edhe ofendime si:
“Me kon je tu fol… për çka i ke ly buzt?”
Prokuroria thotë se ai e ka shqetësuar vazhdimisht Arbenitën përmes telefonatave dhe takimeve, duke i shkaktuar frikë dhe ankth.
Fero po ashtu akuzohet për ngacmim seksual, pasi sipas aktakuzës, ka tentuar ta puthë Arbenitën kundër vullnetit të saj, duke i thënë:
“Ti je gruaja jem, unë kam të drejtë me fjet me ty… nuk ki të drejtë me m’thanë jo.”
Në dokumentin e prokurorisë përmenden edhe kërcënime serioze përmes WhatsApp-it:
“Ke me ma ni krismën… të vraj… ta nxjerri shpirtin prej vendit… fëlqitë nga vendi t’i thej…”
Fero ishte arrestuar më 11 korrik 2023 për sulm fizik ndaj Arbenitës. Me ngritjen e aktakuzës në dhjetor 2024, Prokuroria kërkon dënimin e tij dhe ka paraqitur provat përkatëse.
Avokati i Feros ka konfirmuar aktakuzën për mediat, por nuk ka komentuar më tej. Ndërkohë, Fero është rikthyer në muzikë pas një pauze dyvjeçare dhe përballjes me betejën ligjore për kujdestarinë e vajzës së tyre, Nina.
