Djali i dëbuar në mërgim i Shahut të fundit të Iranit u vetëofrua sot si udhëheqës i përkohshëm për të marrë drejtimin e vendit gjatë tranzicionit larg diktaturës.
Reza Pahlavi, të cilin mbështetësit e tij e quajnë “Princi i Kurorës së Iranit”, u bëri thirrje komunitetit ndërkombëtar të largojë me forcë regjimin teokratik të Ajatollah Ali Khameneit.
Reza Pahlavi tha se po krijon një “platformë të sigurt” të re për disidentët dhe kundërshtarët e brendshëm të regjimit që të koordinojnë përpjekjet për të përmbysur diktaturën dhe për të vënë vendin në rrugën e një të ardhmeje “të lirë dhe demokratike”.
(Reza Pahlavi, djali i Shahut të përmbysur nga Ayatollah Khomeini në revolucionin islamik të vitit 1979)
“Ne jemi një popull krenar, i lashtë dhe i qëndrueshëm,” tha Pahlavi në një konferencë për shtyp në Paris të hënën. “Për bashkëkombësit e mi: Ky është momenti ynë. Jam me ju. Le ta ndërtojmë së bashku këtë Iran të ri.”
“Jam këtu sot për t’u ofruar bashkëkombësve të mi të më besojnë drejtimin në këtë rrugëtim paqeje.”
Reagimi i Reza Pahlavit vjen në një moment kritik për Iranin, teksa vendi ndodhet nën tronditjen e një lufte shkatërruese me Izraelin dhe përballë një presioni të paprecedent ndërkombëtar. Pas sulmeve ajrore izraelite dhe së fundmi amerikane mbi objektet bërthamore iraniane dhe tensioneve në rritje me Shtetet e Bashkuara, regjimi i Ayatollah Khameneit është vënë përballë sfidës më të madhe të ekzistencës së tij në dekada. Në këtë klimë trazirash dhe pasigurie, Pahlavi po përpiqet të paraqitet si një alternativë e bashkuar dhe e besueshme për të ardhmen e Iranit, duke kërkuar mbështetje nga brenda dhe jashtë vendit për një tranzicion paqësor drejt një qeverie demokratike. ©LAPSI.AL
