Kryetari i Partisë Demokratike, Sali Berisha është thirrur për t'u paraqitur ditën e nesërme në Prokurorinë e Posaçme. Lajmi është konfirmuar edhe nga avokati i tij, Genc Gjokutaj përmes një postimi në Facebook.
Ai shprehet se Berisha është thirrur për të dhënë shpjegime lidhur me një kallëzim që gjyqtarja Irena Gjoka ka depozituar në SPAK ndaj Berishës. Duke ironizuar vendimin e SPAK, avokati shkruan se "historikisht keshtu ndodh rëndom me Drejtësine shqiptare: "Hajduti bërtet kapeni hajdutin".
"Nesër në orën 10.00 SPAK ka thirrur Dr. Berishen per te dhënë shpjegime ne lidhje me nje kallëzim qe Gjyqtarja Irena + mbiemra 3 copë ka depozituar! Historikisht keshtu ndodh rëndom me Drejtësine shqiptare: Hajduti bërtet kapeni hajdutin!" - shkruan Gjokutaj.
Në dokumentin e SPAK, prokurori Elvin Gokaj ka urdhëruar paraqitjen e Berishës në orën 10 të së martës përpara Hetuesit të Byrosë Kombëtare të Hetimit Ardit Neli, "me dokument identifikimi me vete".
"Paraqitja e shtetasit të mësipërm kërkohet me qëllim pyetjen e tij si person që ka dijeni për rrethanat e hetimit, të lidhur me hetimet paraprake të proçedimit penal Nr.193 viti 2024, të Prokurorisë së Posaçme kundër Korrupsionit dhe Krimit të Organizuar.
Në rast mosparaqitje në ditën dhe orën e caktuar, pa pasur pengesa të ligjshme, në bazë të nenit 312 të K.Pr.Penale, personi i njoftuar paralajmërohet se do të urdhërohet shoqërimi shoqërimi i detyrueshëm" - thuhet në dokument.
Gjyqtarja Irena Gjoka është akuzuar nga Berisha se është dënuar në Greqi vite më parë, dënim që ajo e ka mbajtur të fshehtë. Për këto akuza, Gjoka e ka kallëzuar Berishën për shpifje. /LAPSI.al
