Samuel L. Jackson, ka ndarë një nga përvojat më tronditëse të jetës së tij, gjatë një interviste të fundit në podcast-in “Mad Sad Bad” të këngëtares Paloma Faith.
76-vjeçari tregoi se mbi 30 vite më parë, u përfshi në një incident të rrezikshëm me një tren në metronë e Nju Jorkut që gati i kushtoi jetën.
“Dera më kapi këmbën dhe treni nisi të lëvizte. U ula dhe thashë me vete: ‘Oh, dreq, do vdes.’ Mund të shihja tunelin që po afrohej dhe nuk dija ku të kapesha,” – rrëfeu aktori.
Për fat, treni nisi të ngadalësohej dhe u ndal përpara se të hynte në tunel, falë një pasagjeri që tërhoqi frenën e emergjencës.
“Ishte një burrë me paterica ai që më shpëtoi jetën. Të tjerët përpiqeshin të më nxirrnin këmbën, por ai shkoi drejt frenës dhe e tërhoqi,” – shtoi Jackson.
Ngjarja ndodhi në dhjetor të vitit 1988, kur aktori kishte ndaluar për të ndihmuar një grua që i kishte rënë diçka. Si pasojë, ai pësoi dëmtime të rënda në këmbë dhe kaloi 10 muaj me paterica. Jackson paditi Autoritetin e Transportit të Nju Jorkut dhe fitoi 540,000 dollarë dëmshpërblim.
Rasti ndodhi pak para Krishtlindjeve, dhe aktori kujton se i vetmi mendim që i vinte ndërmend ishte “Mendova: ‘Kjo Krishtlindje do jetë një rrëmujë. Do më mungojë edhe ditëlindja ime.’”
