Lindsay Lohan ka reaguar ndaj spekulimeve të fundit se ka kryer një lifting fytyre, duke i quajtur thashethemet të pabaza dhe fyese.
Në një intervistë për revistën Elle, ylli i filmit Freakier Friday u shpreh me ironi: "Jam si: Kur? Me çfarë kohe? Ku?", duke lënë të kuptohet se është shumë e angazhuar për të menduar për ndërhyrje të tilla estetike.
Publicistja e saj e mbështeti, duke shtuar: "Këto spekulime janë shumë të liga. Ata mund të urrejnë dhe të jenë xhelozë. Është për të ardhur keq që kjo është mënyra si trajtohen gratë sot – thjesht sepse duken mirë, njerëzit mendojnë menjëherë për ndërhyrje."
Lohan, e cila është bërë nënë para gati dy vitesh, theksoi se ndryshimi në pamjen e saj i dedikohet një mënyre jetese më të shëndetshme pas lindjes së djalit të saj, Luai. Ajo ndjek një regjim ushqimor strikt dhe kujdes të veçantë për lëkurën.
"Çdo mëngjes pi një lëng me karrota, xhenxhefil, limon, vaj ulliri dhe mollë," tregoi aktorja. "Gjithashtu, pi shumë çaj jeshil dhe ujë. Jam e fiksuar pas panxharit turshi dhe e shtoj pothuajse në çdo gjë."
Ajo shtoi se pas lindjes, lëkura e saj u bë më e ndjeshme, çka e detyroi të ndryshojë rutinën dhe dietën, duke përfshirë edhe analiza të detajuara për alergjitë ushqimore.
Megjithatë, Lohan nuk është kundër plotësisht procedurave kozmetike. "Të gjithë bëjnë botoks," shtoi ajo duke qeshur. "Nëse dikush thotë se nuk e ka bërë kurrë, thjesht nuk po tregon të vërtetën."
