Princ Harry dhe Meghan Markle, të cilët u larguan nga jeta mbretërore në vitin 2020 dhe u shpërngulën në SHBA, kanë ristrukturuar ekipin e tyre të stafit, që tani ngjan shumë me oborrin mbretëror të familjes mbretërore, raportoi “Daily Mail”.
Sipas raportimeve, ekipi i ri do të drejtohet nga Meredith Kendall Maines dhe do të përbëhet nga 11 vetë. Organizata do të bazohet në Montecito, Kaliforni, si dhe në Mbretërinë e Bashkuar.
Operacioni thuhet se do të funksionojë plotësisht në mënyrë të pavarur nga Archewell, fondacioni që Harry, 40 vjeç, dhe aktorja e “Suits”, 43 vjeç, e themeluan në tetor 2020.
Lëvizja është kritikuar nga komentues dhe historianë mbretërorë. Eksperti Richard Fitzwilliams tha se çifti duket sikur po afrohet sërish me stilin e jetës mbretërore, pavarësisht se e kanë sulmuar ashpër atë në të kaluarën.
“Hipokrizia qëndron në faktin që Harry ka sulmuar në mënyrë të përsëritur oborrtarët dhe familjen mbretërore, duke i konsideruar armiq. Pra, është mjaft befasuese që ai po përpiqet të krijojë një strukturë të ngjashme në Montecito,” tha Fitzwilliams për “Daily Mail”.
Ai shtoi se, ndryshe nga nëna e tij, Princesha Diana, e cila nuk pranonte mbrojtje policore për shkak të mosbesimit ndaj saj, Harry tani kërkon mbrojtje të tillë për veten dhe familjen e tij.
Eksperti tjetër mbretëror, Tom Bower, e quajti ristrukturimin “përpjekje të fundit të dëshpëruar për të shpëtuar markën e tyre.”
“Pa dyshim, Sussexët do të donin të qeverisnin një 'oborr mbretëror' nga vila e tyre në Montecito,” tha ai. “Asgjë nuk do t’i gëzonte më shumë se të kishin oborrtarë që përkuleshin para tyre për t’i kënaqur.”
Ai shtoi se, edhe pse kjo strukturë duket si një kopje e oborrit mbretëror të Buckingham dhe Kensington, ajo nuk është gjë tjetër veçse “një grup burokratësh shumë të shtrenjtë që sinjalizojnë përpjekjen e fundit të Sussexëve për të shpëtuar markën e tyre”.
Bower paralajmëroi gjithashtu se, nëse Harry ndjek shembullin e Meghan për të komercializuar titullin e tij, kjo do ta shuante plotësisht çdo mundësi për pajtim me familjen mbretërore dhe kthim në Britani.
Zëdhënësi i çiftit tha për “New York Post”:
“Shefja e Komunikimeve, Meredith Maines, ka angazhuar firmën globale Method Communications për të forcuar ekipin e saj, që do të mbikëqyrë përpjekjet filantropike të Dukës dhe Dukeshës së Sussex.”
Në SHBA, ekipi do të udhëhiqet nga zëvendëspresidentët ekzekutivë Clay Blackham, Erin Grant dhe zëvendëspresidentja e lartë Casey Adams, ndërsa në Mbretërinë e Bashkuar nga këshilltari i lartë për media, Liam Maguire.
