Këngëtarja dhe modelja e njohur Cassie Ventura, është bërë nënë për herë të tretë.
Sipas raportimeve të ABC News, Cassie ka mirëpritur fëmijën e tretë së bashku me bashkëshortin e saj, Alex Fine. Detaje të tjera lidhur me lindjen nuk janë bërë ende publike.
Lajmi vjen vetëm pak ditë pasi Ventura dëshmoi në gjyqin federal ndaj ish-partnerit të saj, Sean “Diddy” Combs, i cili përballet me akuza për trafikim seksual dhe përfshirje në një rrjet kriminal.
Cassie, e cila ka pasur një marrëdhënie të gjatë dhe të ndërlikuar me Diddy nga viti 2007 deri në 2018, ishte dëshmitarja e parë që u thirr në gjyq, i cili nisi më 5 maj në një gjykatë federale në Manhattan. Në momentin e dëshmisë, ajo ishte mbi tetë muajsh shtatzënë dhe kaloi katër ditë në sallën e gjyqit, ku rrëfeu abuzime seksuale, dhunë fizike dhe emocionale të pretenduara gjatë lidhjes me Diddy.
“Ishte një përvojë jashtëzakonisht sfiduese, por edhe fuqizuese dhe shëruese,” – tha Cassie në një deklaratë më 16 maj.
“Shpresoj që dëshmia ime t’u ketë dhënë forcë dhe zë të mbijetuarve të tjerë, që të flasin dhe të nisin shërimin nga abuzimi dhe frika.”
Pas përfundimit të dëshmisë, artistja kërkoi privatësi për të përqendruar energjinë te familja. Më 27 maj, ajo u raportua se u shtrua në një spital në New York për lindje, ndoshta për shkak të ndërlikimeve të mundshme.
Cassie dhe Alex Fine janë martuar në gusht të vitit 2019 dhe kanë dy vajza – Frankie (5 vjeç) dhe Sunny (3 vjeç). Ata u njohën kur Fine u punësua si trajner personal i Diddy-t dhe filluan lidhjen pas ndarjes së Cassie me producentin e njohur.
