Katy Perry ka reaguar së fundmi ndaj kritikave të ashpra që ka marrë për turneun e saj “The Lifetimes” dhe për fluturimin në hapësirë me Blue Origin.
Ajo ka shprehur mirënjohje për fansat dhe ka theksuar se është në një “udhëtim të bukur dhe të egër” bashkë me ta.
Perry, e cila udhëtoi në hapësirë së bashku me gazetaret Gayle King dhe Lauren Sánchez (e fejuara e miliarderit Jeff Bezos), është bërë pjesë e ekuipazhit të parë tërësisht femëror në më shumë se gjashtë dekada.
Megjithatë, shumë figura publike, përfshirë Emily Ratajkowski, Olivia Munn dhe Jessica Chastain, e kanë kritikuar këtë udhëtim, duke e quajtur të panevojshëm dhe të dëmshëm për mjedisin.
Në një koment të sinqertë në Instagram, këngëtarja tha:
“E di që shumë njerëz janë duke vuajtur në mënyra të ndryshme dhe interneti është shpesh një vend ku derdhen ndjenja të paqëndrueshme e të pa shëruara.”
Ajo shtoi se terapisti i saj e ka ndihmuar të kuptojë se askush nuk mund ta bëjë të besojë diçka për veten që ajo vetë nuk e beson tashmë. Përmes koncerteve dhe lidhjes me fansat, Perry thotë se ndihen të gjithë si pjesë e një procesi shërimi.
Turneu i saj i fundit, që nisi në Meksikë, përfshin veshje me tematikë hapësinore dhe elemente të frymëzuara nga lojërat video dhe filmat si The Fifth Element dhe Blade Runner, megjithëse shumë njerëz gabimisht e kanë lidhur stilin me udhëtimin në hapësirë.
