Bashkia e Tiranës po nënshtrohet një pastrimi rrënjësor nga njerëzt e besuar të Erjon Veliajt. Pas zbythjes që shfaqi kryetari në detyrë, i izoluar në qelinë e Durrësit, tashmë Anuela Ristani, nënkryetarja e besuar e Edi Ramës ka firmosur shkarkimin e Alban Dokushit, sekretarit të përgjithshëm të Bashkisë së Tiranës.
Dokushi është zëvëndësuar nga Jonida Halili që ka marrë postin e sekretares së përgjithshme të Bashkisë së Tiranës.
Alban Dokushi është një mik i afërt i Veliajt, madje bashkëjetuesja e tij Sara Goxhaj u përzgjodh nga Veliaj për t'iu kundërvënë Ramës nëpërmjet një tentative që u interpretua si rebelim kundër kryeministrit, por që zgjati vetëm 24 orë.
Veliaj bëri një përpjekje për t’i vinte një kufi Edi Ramës që tashmë ka marrë nën kontroll institucionin, por përpjekja nuk i zgjati shumë. Ai u dorëzua pa kushte dhe me një mesazh në Facebook deklaroi publikisht se i kishte ardhur në mendje një “ide e gabuar”.
“Kam firmosur një ridelegim me idenë e gabuar se ishte dakordësuar brenda ekipit drejtues, por kështu është kur “punon” pa informacionin e mjaftueshëm” u shpreh Veliaj në një status në Facebook, ku shpalli kapitullimin me një gjuhë të përulur për shefin e tij.
Veliaj u arrestua në datën 10 shkurt dhe përballet me tre akuza, për korrupsion, fshehje të pasurisë dhe pastrim të parave.
