Kur mendoni për destinacionet e njohura të udhëtimit, Spanja, Italia dhe Greqia janë ndoshta gjërat e para që ju vijnë në mendje. Kështu nis një shkrim i medias gjermane “Merkur.de” që i ka kushtuar vëmendje asaj që po ndodh me Shqipërinë për të cilën thotë se ka njohur një rritje me 80% të rritjes së turistëve brenda 5 viteve.
Nisur nga këto shifra Shqipëria renditet me një diferencë të qartë në krye të listës së OKB-së për rritjen e turizmit, por edhe kjo ka një anë tjetër të medaljes. Eksperti ballkanik Marco Wipfli, pronar i agjencisë turistike ”Meersicht”, me seli në Zyrih thotë se arsyeja e rritjes së madhe të turizmit shqiptar vjen kryesisht për shkak të çmimeve të ulëta.
“Shqipëria është një nga destinacionet më të lira të pushimeve në Evropë. Sipas të dhënave nga Enti Federal i Statistikave, qëndrimet në hotele dhe vizitat në restorante në vendin ballkanik kushtojnë më pak se gjysma e çmimit të Gjermanisë. Gjithnjë e më shumë pensionistë italianë po emigrojnë në Shqipëri për shkak të këtyre çmimeve të ulëta” – thuhet në shkrim ku nënvizohet se “kjo së shpejti mund të marrë fund.
Wipfli parashikon se çmimet në Shqipëri do të “rriten masivisht” në vitet e ardhshme. “Për vendin ekonomikisht të dobët, bumi i turizmit është një levë e madhe ekonomike” – citohet të ketë thënë kryeministri i Shqipërisë Edi Rama.
“Sipas OKB-së, rritja ekonomike prej 5% në vitin 2022 është e lidhur ndjeshëm me të ardhurat fitimprurëse nga turizmi. Por kjo tashmë po bën që çmimet të rriten. Revista shqiptare e biznesit Monitor raporton se çmimet për shërbimet e ofruara në disa zona janë rritur deri në 90% nga viti 2023 në 2024” – thotë shkrimi.
“Kjo është vetëvrasje, rritja e çmimeve do të ketë pasoja në verën e 2025. Dhe është turp që kjo ndodh kur ne kemi hyrë në “Champions League” të turizmit mesdhetar” – citohet sërish Rama. ©LAPSI.al
