Empoli ka shkaktuar befasinë e madhe duke triumfuar në “Allianz Stadium” pas goditjeve të penalltive me rezultatin 5-3, pasi koha e rregullt u mbyll në barazim 1-1. Ky sukses i jep toskanëve një kualifikim historik në gjysmëfinalet e Kupës së Italisë, për herë të parë në histori. Ekipi i D’Aversës përfitoi nga një mbrëmje e dobët e Juventus, duke kaluar në avantazh në minutën e 24' me një goditje të fuqishme nga jashtë zone të Maleh. Empoli pati disa raste për të dyfishuar rezultatin, duke përfshirë shtyllën e Konate në fund të pjesës së parë.
Juventus arriti të barazonte në minutën e 66' falë një veprimi të jashtëzakonshëm të Thuram, por ndeshja u vendos nga pika e bardhë e penalltisë. Gabimet e Vlahovic dhe Yildiz i kushtuan bardhezinjve, ndërsa lojtarët e Empolit realizuan të gjitha goditjet e tyre. Tani, skuadra e D’Aversës do të përballet me Bologna në gjysmëfinalen me dy takime.
Juve, një tjetër eliminim i dhimbshëm
Vetëm një javë pas eliminimit nga Champions League, Juventus përjeton një tjetër goditje, duke u eliminuar edhe nga Kupa e Italisë pas disfatës me penallti ndaj Empolit (3-5). Ky është një moment historik për toskanët, ndërsa për ekipin e Thiago Motta një tjetër zhgënjim i madh.
Lexo më tej: Silura e Arnautovic e penalltia e Calha: shembet Lazio, Inter shkon në derbin e Kupës
Juventus e pati mundësinë e parë të artë që në minutën e 2', me Nico Gonzalez që nuk arriti të shënonte përballë portierit Vasquez. Megjithatë, ishin miqtë që kaluan në epërsi me Maleh, i cili shënoi me një goditje fantastike nga 20 metra distancë. Deri në momentin e barazimit nga Thuram (66’), që u realizua pas një veprimi të bukur me takë dhe prekje delikate në zonë, Empoli pati rastet më të mira. Konate rrezikoi dy herë, duke përfshirë edhe një goditje në shtyllë në minutën e 45', ndërsa Maleh dhe Sambia patën gjithashtu shanset e tyre.
Te penalltitë, Empoli nuk gaboi asnjëherë, ndërsa Vlahovic dhe Yildiz dështuan për Juven. Tashmë, në prill, skuadra toskane do të sfidojë Bologna për një vend në finalen e madhe.
