Përmbysje dhe kundërpërmbysje në gjysmëfinalen e parë të Kupës së Mbretit: një ndeshje e çmendur mes Barcelonës dhe Atletico Madrid përfundon 4-4. Një fillim shokues për Barcelonën, e goditur që në minutën e parë nga Julian Alvarez dhe në të gjashtën nga Griezmann. Pedri ngushton diferencën në minutën e 19-të, ndërsa Cubarsì dy minuta më vonë barazon shifrat. Më pas, Inigo Martinez në minutën e 41-të kompleton përmbysjen. Lewandowski e çon rezultatin në 4-2 në minutën e 74-t, por goli i Llorente dhjetë minuta më vonë dhe rrjeta e Sorloth në minutën e 93-të e shtyjnë çështjen e kualifikimit për ndeshjen e kthimit.
Spektakël i çmendur në “Montjuïc”
Barcelona dhe Atletico Madrid dhurojnë një ndeshje të paharrueshme në gjysmëfinalen e parë të Kupës së Mbretit, e cila përfundon në një barazim spektakolar 4-4. Ekipi i Simeones nisi furishëm: pas vetëm disa sekondash, në zhvillimet e një goditjeje nga këndi, Julian Alvarez shfrytëzon krosimin e Lenglet dhe mposht Szczesnyn. Vetëm pesë minuta më vonë, Colchoneros dyfishojnë shifrat, ndërsa vendasit duken të tronditur: sërish Alvarez në qendër të vëmendjes, këtë herë me një asist për ish-lojtarin e Barcelonës, Griezmann.
Lexo më tej: Rolling Stones përzënë El Clasico nga Spanja: Barcelona-Real Madrid në Wembley
Pas këtij fillimi shkatërrues, skuadra e Flick reagon dhe në minutën e 19' Pedri ngushton diferencën pas një asisti të Koundés. I motivuar nga goli, Barça arrin barazimin dy minuta më vonë: një goditje nga këndi perfekte e Raphinhës dhe një goditje me kokë e saktë e Pau Cubarsì sjellin rezultatin në 2-2. Skema përsëritet edhe në minutën e 41', kur Barcelona arrin përmbysjen: një tjetër krosim i saktë i brazilianit, por këtë herë është Inigo Martinez ai që e dërgon topin në rrjetë. Pjesa e parë mbyllet me rezultatin 3-2 për katalanasit.
Colchoneros "lajnë hakun" e rikuperimeve
Në pjesën e dytë, Barcelona nuk ndalet dhe në minutën e 74' e çon avantazhin në 4-2 falë një kombinimi të bukur të Yamal, që shërben për Lewandowskin. Ndeshja e mbyllur dhe kualifikimi i siguruar? Jo ende, sepse dhjetë minuta më vonë Marcos Llorente shënon për 4-3, duke e mbajtur Atleticon në garë. Fundi i ndeshjes është dramatik dhe në minutën e 93', Sorloth realizon një gol të pabesueshëm për të barazuar 4-4.
Gjithçka do të vendoset në ndeshjen e kthimit në fillim të prillit, ku Atletico Madrid dhe Barcelona do të luftojnë për një vend në finalen e Kupës së Mbretit në 90 minutat vendimtare në “Metropolitano”.
