Manchester United për turp: 200 shkurtime të reja nga puna e panine e supë në mensë

Shtrëngimi i shpenzimeve po prek edhe klubet super të pasura të Premier League. Dhe njoftimi i fundit nga klubi më i famshëm i Anglisë, Manchester United, në pronësi të një prej njerëzve më të pasur në botë, shefit të gjigantit Ineos, Sir Jim Ratcliffe (i cili ka një pasuri personale prej 16 miliardë dollarësh sipas Forbes), e bën të qartë se as në Angli nuk mund të anashkalohen më rezultatet në fushë.

Masat e reja

Bordi i “Djajve të Kuq”, që po kalon një krizë rezultatesh prej 8 vitesh (me vetëm dy trofe të fituar, një Carabao Cup dhe një FA Cup), dhe që këtë sezon është zhytur në vendin e 15-të në renditje pas 26 javësh kampionat, ka njoftuar masa të reja për të ulur kostot dhe për të përmirësuar qëndrueshmërinë financiare të klubit. Ndër këto masa përfshihet një valë tjetër shkurtime të vendeve të punës, rreth 200 punonjës të tjerë (që do t’i shtohen 250 të shkurtuarve vitin e kaluar) dhe iniciativa për të reduktuar shpenzimet, disa prej të cilave kanë shkaktuar shumë kureshtje. Mbi të gjitha, vendimi i marrë për mensën në qendrën stërvitore të Carrington ka tërhequr vëmendjen.

Shpjegimi i vendimit

“Kemi humbur para për pesë vite radhazi. Kjo nuk mund të vazhdojë. Dy prioritetet tona kryesore si klub janë të kemi sukses në fushë për tifozët tanë dhe të përmirësojmë infrastrukturën tonë. Nuk mund të investojmë në këto objektiva nëse vazhdojmë të humbasim para. Kemi përgjegjësinë për ta vendosur Manchester United në pozitën më të mirë për të fituar me ekipet tona, si ato të meshkujve, femrave dhe të rinjve. Po nisim një sërë masash të gjera që do të transformojnë dhe rigjallërojnë klubin. Fatkeqësisht, kjo do të thotë se duhet të shpallim shkurtimin e vendeve të punës, dhe na vjen thellësisht keq për ndikimin që kjo ka mbi kolegët tanë të prekur. Megjithatë, këto zgjedhje të vështira janë të nevojshme për ta rikthyer klubin në një bazë financiare të qëndrueshme”, ishin fjalët e CEO-së së Manchester United, Omar Berrada.

Club statement: United announce transformation plan.#MUFC

— Manchester United (@ManUtd) February 24, 2025

United shkurton kostot në mensë: vetëm sanduiçe dhe supa

Përveç shkurtimit të personelit, sipas asaj që raporton gazeta britanike Daily Mail, sektori që do të reduktohet më shumë për të ulur shpenzimet është ai ushqimor. Mensa e stafit në “Old Trafford” do të mbyllet, duke i lënë punonjësit pa ushqimin falas që kishin deri më tani (nga tani e tutje do të kenë vetëm fruta në dispozicion). Ndërkohë, mensa e qendrës stërvitore në Carrington do të pësojë një reduktim të ndjeshëm në ofertën e saj ushqimore. Ndryshe nga më parë, tashmë për futbollistët dhe stafin teknik do të jenë të disponueshme vetëm dy lloje ushqimesh: ata do të duhet të zgjedhin mes supës dhe sanduiçëve.