Roma vazhdon të ecë me ritëm të lartë në kufijtë e zonës që të çon në Evropë. Në ndeshjen e fundit të javës së 26-të të Serie A, skuadra e teknikut Claudio Ranieri shkatërron 4-0 Monza, siguron fitoren e tretë radhazi dhe shkon në kuotën e 40 pikëve.
Në “Olimpico” skena ishte e gjitha verdhekuqe. Në pjesën e parë, Saelemaekers (10’) zhbllokoi ndeshjen me një goditje të bukur me të majtën nga distanca, ndërsa Shomurodov (32’) dyfishoi me kokë pas një asisti perfekt nga Soulé. Në pjesën e dytë, Angelino (73’) dhe Cristante (88’) vulosën fitoren me një goditje të saktë nga distanca dhe një goditje të bukur me kokë.
Rezultati i dhjetë pozitiv radhazi
Para afro 57 mijë tifozëve, Roma e “magjistarëve” Baldanzi, Soulé dhe Saelemaekers dominon në “Olimpico”. Verdhekuqtë mposhtin pa vështirësi Monzan e vendit të fundit në renditje, me golat e Saelemaekers dhe Shomurodov në pjesën e parë, si dhe Angelino e Cristante në të dytën.
Lexo më tej: Gatti dhe Weah përplasen ashpër pas Cagliari-Juventus: çfarë ndodhi mes juventinëve!
Claudio Ranieri nuk ndalet më: me shtatë fitore dhe tre barazime në dy muajt e fundit, trajneri verdhekuq i afrohet zonës evropiane, duke qenë përkohësisht -1 nga Bologna dhe Milan (që të enjten do të luajnë përballë njëra-tjetrës) dhe -2 nga Fiorentina. Mes tifozëve është rikthyer entuziazmi, i cili jo më larg se në dhjetor dukej i humbur përfundimisht.
