Anulimi i një konference për shtyp pesë deri në dhjetë minuta para fillimit, me gazetarët tashmë të pranishëm në sallën e konferencave, është një ngjarje jashtëzakonisht e rrallë dhe shpjegon pjesërisht momentin delikat që po kalon Napoli. Faktet janë të njohura: dje, në orën 15:00, Massimiliano Allegri duhej të fliste në prag të ndeshjes kundër Lazios, e planifikuar për sot në orën 12:30, por Aurelio De Laurentiis, pak minuta para orarit të caktuar, urdhëroi ndalimin e saj. Trajneri toskan, natyrisht, e pranoi vendimin, ndërsa punonjësit e zyrës së shtypit u detyruan t’ua komunikonin këtë gazetarëve.
Presidenti, përmes një postimi në rrjetet sociale, shpjegoi se nuk ka “asnjë çështje. Jemi në grumbullim dhe duhet shmangur çdo shpërqendrim”. Pyetja lind natyrshëm: Napoli është në grumbullim që prej së premtes, atëherë përse konferenca për shtyp nuk u anulua në kohë?
Sipas “Gazzetta dello Sport”, gjithçka e ka origjinën pas ndeshjes në Porto, me deklaratat e dhëna nga Politano, McTominay dhe Hojlund. Fjalë që ekspozuan para publikut krisjet në dhomën e zhveshjes, fjalë që nuk i pëlqyen De Laurentiis, i cili, krahas grumbullimit, kishte kërkuar të shmangeshin deklarata të tjera publike, duke iu referuar qartësisht edhe konferencave për shtyp (kujtojmë se, ndryshe nga rregulloret e UEFA-s, ato nuk janë të detyrueshme në Serie A).
Allegri, i cili nuk është tërhequr kurrë, as në momentet më delikate, kishte shprehur gjithsesi gatishmërinë për të folur me gazetarët në prag të ndeshjes. Kështu erdhi komunikimi nga zyra e shtypit e Napolit dhe organizimi i konferencës në orën 15:00. Diçka për të cilën, ndoshta, presidenti nuk ishte njoftuar. Pasi mori vesh, në momentin e fundit, për konferencën për shtyp, De Laurentiis anuloi gjithçka.
